Qazaqstanda koronavırýsqa qarsy vaktsına sheteldik stýdentterge aqysyz egiledi

NUR-SULTAN. QazAqparat - Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı Qazaqstanda adamdardyń qaı sanattaryna vaktsınalaý aqysyz egiletindigin aıtty, dep habarlaıdy QazAqparat tilshisi.

«Qazirgi kezde vaktsınalaý Qazaqstan azamattaryna, elde turýǵa yqtııarhaty bar jáne el aýmaǵynda turaqty turyp jatqan adamdarǵa tegin júrgiziledi», - dedi mınıstr Ortalyq kommýnıkatsııalar qyzmetinde.

Onyń aıtýynsha, aqysyz vaktsınalaý sheteldikterdiń keıbir sanattaryna usynylady.

«Budan bólek, keshe koronavırýs ınfektsııasyna qarsy is-qımyl jónindegi Vedomstvoaralyq komıssııa otyrysynda tıisti sheshim qabyldandy. Osy oraıda ujymdyq ımmýnıtetti qamtamasyz etý úshin el ishinde úsh aıdan astam ýaqyt júrgen sheteldik stýdentter men eńbek mıgranttary aqysyz ekpe alady», - dedi A. Tsoı.