Qazaqstanda koronavırýsqa qarsy vaktsına ázirlene me – mınıstr jaýaby

NUR-SULTAN. QazAqparat - QR Densaýlyq saqtaý mınıstri Eljan Birtanov koronavırýsqa qarsy vaktsına ázirleý týraly tilshiler suraǵyna jaýap berdi, dep habarlaıdy QazAqparat tilshisi.

«Qazaqstan Úkimeti úshin negizgi maqsat – ınfektsııanyń kirmeýi jáne taralmaýy bolyp otyr. Sondyqtan, negizgi qarajat halyq pen medıtsınalyq qyzmetkerlerdi, shekarashylardy qorǵaýǵa baǵyttalǵan. Odan bólek, koronavırýs kúdigi bar paıtsentterdiń barlyǵyn jetkilikti túrde tekserip, dárilik zattar qoryn jasaý úshin dıagnostıkalyq tehnologııalarǵa mán berilgen», - dedi E. Birtanov elordada ótken baspasóz máslıhatynda.

Onyń aıtýynsha, Bilim jáne ǵylym mınıstrligi men oǵan baǵynyshty ǵylymı ortalyqtar osyndaı vaktsınany ázirleýge daıyn ekendikterin habarlaǵan.

«Bizdiń elimizde vaktsına jasaý boıynsha jaqsy tájirıbe bar. Bul jaǵdaıda sáıkes ǵylymı ortalyqtarda belgili bir jumystar bar. Alaıda, munyń qıyn tehnologııalyq protsess ekenin túsiný qajet jáne barlyq halyqaralyq ǵylymı ortalyqtarmen úılestiri júmystaryn júrgizý kerek. Qazir vaktsına jasaý boıynsha ózge elderdiń ǵalymdarymen birlesip jumys isteý múmkindigin qarastyryp jatyrmyz», - dedi ol.

Árıne, mundaı vaktsına shyǵarylsa, ol óte sapaly jáne qaýipsiz bolýy kerek.

«Ekinshiden, halyqqa qoljetimdi bolýy kerek. Qazir bir nárseni naqty aıtýǵa erte. Bálkim, Qazaqstan men ózge de memleketter jasaǵan sanıtarlyq sharalar ınfektsııanyń azaıýyna yqpal etken shyǵar. Bul indetti jaqyn arada eńseremiz dep úmittenemin jáne vaktsınany ázirleý jumystaryn qatar júrgize beremiz», - dedi Eljan Birtanov.