Qazaqstanda koronavırýsqa baılanysty jedel jeli iske qosyldy

NUR-SULTAN. QazAqparat - QR Densaýlyq saqtaý mınıstrligi Qytaıda taraǵan koronavırýsqa qatysty jedel jelini iske qosty, dep habarlaıdy QazAqparat.

«Qazaqstan Respýblıkasynyń Densaýlyq saqtaý mınıstrliginiń janynan call-ortalyq (1406, [phone]) is qosyldy. Azamattar osy nómirlerge táýlik boıynsha habarlasyp, álemdegi koronavırýsqa qatysty ahýal jaıly suraqtaryna jaýap ala alady. Sonymen birge, jedel jeli aýrýdyń negizgi belgileri men aldyn alý sharalaryna baılanysty paıdaly keńes bere alady», - delingen mınıstrliktiń facebook paraqshasynda.

Mınıstrliktiń habarlaýynsha, koronavırýstyń alǵashqy belgileri – bastyń aýrýy, tumaý, keýdedegi aýyrlyq, ókpeniń qabynýy, qyzýdyń kóterilýi, júrek qaǵysynyń jıileýi, demniń jedeldeýi.

«Mundaı jaǵdaıda em sharasyn ózdigimen qabyldamaı, birden 103 nómirine habarlasý kerek!» - dep eskertedi mınıstrlikten.

Eske sala ketsek, osy aptanyń jumasynda QR Syrtqy ister mınıstrligi Qytaıdaǵy koronavırýsty 830 adam juqtyryp, 25 adam kóz jumǵanyn habarlaǵan bolatyn.

Sondaı-aq, búgin QR Prezıdenti Qasym-Jomart Toqaev Qytaıdan Qazaqstan aýmaǵyna koronavırýstyń taralýyna jol bermeý boıynsha naqty uıymdastyrý sharalaryn qabyldaýdy tapsyrǵan edi.