Qazaqstanda koronavırýsqa baılanysty jatqyzylǵan 43 adam aýrýhanadan shyqty
«6 qańtardan keıin Qytaıdan oralǵan qazaqstandyqtardyń 90%-men baılanys ornatyldy. Olardyń arasynda 89 adam dene qyzýymen jáne JRVI belgilerimen aýrýhanaǵa tústi. 43 adam emdelip shyqty jáne 46 adam statsıonarda qaldy», - dedi Jandarbek Bekshın Qazmedıa ortalyǵynda ótken brıfıngte.
Bas dáriger bul baqylaýdyń barlyq turǵyndarǵa emes, 6 qańtardan bastap Qytaıdan kelgenderge ǵana qatysty ekenin eske saldy.
«Barlyq baqylaýdaǵy aýrýhanalardan alynǵan synamalardy qosymsha zertteý úshin Almatydaǵy Áıtimbaev atyndaǵy asa qaýipti ınfektsııalar ulttyq ǵylymı ortalyǵyna jiberip jatyrmyz. Bul ortalyq jańa koronavırýsty dıagnostıkalaıtyn Polımerazdy tizbekti reaktsııa ádistemesin meńgergen. Eger shetelden kelseńiz, deneńizdiń qyzýyn baqylańyz. Kúdik týǵan jaǵdaıda barlyq emhanany aralap, sharshamańyz. Birden 1406 nómirine habarlasyńyz», - dedi Jandarbek Bekshın.
Buǵan deıin bas sanıtarlyq dáriger Ýhan qalasynan evakýatsııalanǵan azamattardyń jaǵdaıy týraly aıtyp bergen edi. Buǵan deıin Qazaqstanda koronavırýs kúdigimen 80 adam aýrýhanaǵa jatqyzylǵan edi.
Sondaı-aq, 4 aqpannan bastap, Qazaqstan men Qytaı arasyndaǵy áýe qatynasy toqtaıdy.
Dúnıejúzinde búgin túske deıin vırýs juqtyrǵandar sany 17 459 adamǵa jetti. Odan 362 adam qaıtys boldy jáne 483 adam tolyq jazylyp shyqty. Ólimge ákep soqqan 96 paıyz oqıǵa aýrýdyń oshaǵy bolǵan Hýbeı provıntsııasynda tirkelgen.