Qazaqstanda koronavırýs juqtyrý jáne vaktsınalaý qarqyny qatar ósip keledi
NUR-SULTAN. QazAqparat – Elimizde koronavırýs juqtyrý qarqyny men vaktsınalaý qatar ósip keledi. Bul týraly Qoǵamdyq densaýlyq saqtaý ulttyq ortalyǵynyń basqarma tóraǵasynyń orynbasary Aınagúl Qýatbaeva Ortalyq kommýnıkatsııalar qyzmetinde aıtty, dep habarlaıdy QazAqparat.
«Búgingi tańda jer sharyndaǵy pandemııanyń qozdyrǵysh vırýsynyń ártúrli nusqalary keń taralýyna baılanysty vaktsınatsııaǵa degen suranys, talpynys, vaktsınamen qamtamasyz etý belsendiligi kóptegen memleketterde baıqalýda. Jer sharynda 182 mıllıonnan astam adam koronavırýs juqpasymen aýyrǵan. Ókinishke qaraı, sonyń arasynda 3,9 mln ólim-jitim oqıǵasy tirkelip otyr», - dep bastady sarapshy.
Qazaqstanda da pandemııa bastalǵannan beri vırýs juqtyrǵandardyń sany birtindep jarty mıllıondyq mejege jaqyndap keledi.
«Qazaqstanda laboratorııamen dáleldengen 423 137 koronavırýs indeti anyqtalǵan. Onyń ishinde sońǵy táýlikte 2016 jaǵdaı tirkelgen. Sonymen qatar, koronavırýsqa yqtımaldyǵy joǵary, pnevmonııamen qatar júretin 57 025 jaǵdaı tirkelgen bolsa, sońǵy táýlikte 83 fakti belgili boldy», - dedi Qoǵamdyq densaýlyq saqtaý ulttyq ortalyǵynyń ókili.
