Qazaqstanda koronavırýs juqtyrý kórsetkishi 2 esege jýyq tómendedi
NUR-SULTAN. QazAqparat - Qazaqstanda koronavırýs juqtyrý kórsetkishi 2 esege jýyq tómendedi. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Memleket basshysynyń qoldaýy men túsinistik tanytýynyń arqasynda biz aýrýdy statıstıkalyq esepke alýǵa kóshtik. Qazaqstan klınıkalyq-epıdemıologııalyq málimetter negizinde zerthanalyq naqtylaýsyz koronavırýs ınfektsııasy jaǵdaılaryn tirkeýdi alǵashqylardyń biri bolyp qolǵa aldy. Bul eń birinshi kezekte el halqynyń indet aýqymyn túsiný úshin qajet boldy», - dedi mınıstr.
Onyń atap ótýinshe, statıstıkaǵa jańa ádis engizý tósek-oryn qoryn aıtarlyq keńeıtý esebinen statsıonarlyq em alatyn patsıentter sanyn barynsha ulǵaıtýǵa múmkindik berdi.
«Bul júzdegen ómirdi saqtap qaldy. Óıtkeni, adam ómirin saqtap qalý úshin qajetti dem alýdy jasandy qoldaý tek statsıonarlyq jaǵdaıda ǵana kórsetiledi», - dedi ol.
Mınıstr dereginshe, koronavırýs indetine baılanysty jedel járdem shaqyrý 62 paıyzǵa tómendegen.
«Qabyldanǵan sharalardyń arqasynda densaýlyq saqtaý júıesine júktemeniń negizgi kórsetkishterin tómendetýge qol jetkizildi. Elimizde ortasha eseppen aýrýdyń táýliktiń ósimi 2 esege jýyq tómendep, emdelip shyqqandar sany 73,6 paıyzǵa artty», - dedi Alekseı Tsoı.
