Qazaqstanda koronavırýs juqtyrǵandardyń ishinde jazylǵandardyń úlesi 87 paıyzdan asty

«Ótip bara jatqan jyl búkil álem úshin ońaı bolǵan joq. COVID-19 degen ataýǵa ıe bolǵan jańa vırýs paıda boldy. Sol vırýstyń saldarynan týyndaǵan pandemııaǵa áli núkte qoıylmady. Vırýs alǵash paıda bolǵan kezde onymen qalaı kúresip, anyqtap, emdeý kerektigin eshkim bilgen joq. Alaıda biz osy vırýstyń aldyn alý sharalaryn bilip, bárimiz de qorǵanýǵa kómektesetin ádetterdi úırendik. Dıagnostıka jasap, jańa ınfektsııadan azamattardy emdeý isin ıgerdik. Búgingi tańda búkil álemde vaktsınatsııa sekildi spetsıfıkalyq aldyn alý sharalary qoljetimdi boldy. Sonymen qatar biz qolda bar málimetterdi paıdalanyp, aýrý juqtyrý kórsetkishin boljaýdy úırendik. Osynyń arqasynda aldyn alý sharalaryn júrgizip jatyrmyz», - dedi QR Densaýlyq saqtaý birinshi vıtse-mınıstri Marat Shoranov OKQ-da ótken baspasóz máslıhatynda.

Onyń aıtýynsha áıtse de búkil álemde koronavırýsty juqtyrý deńgeıi áli de báseńdemegen. 218 elde koronavırýsty 81 mıllıon adam juqtyrǵan, onyń ishinde 1 mıllıon 700 myń adam kóz jumǵan.

«Bizdiń elde koronavırýsty juqtyrǵan adamdardyń sany 152 460-qa jetti. Qazirgi tańda koronavırýstan jazylǵandardyń sany 87 paıyzdan asty. Esterińizde bolsa osy jyldyń maýsym jáne shilde aılarynda bul kórsetkish 60 paıyzdan asqan joq bolatyn. Bizdiń elde de epıdemıologııalyq ahýal turaqty emes (koronavırýs boıynsha). Qazaqstan tómengi qaýip aımaǵynan birkelki qaýip aımaǵyna, ıaǵnı «jasyl» aımaqtan «sary» aımaqqa ótti. Atyraý, Qostanaı, Pavlodar jáne Aqmola oblystary qazirgi ýaqytta «qyzyl» aımaqta tur. Al «sary» aımaqta Nur-Sultan, Almaty qalasy men SQO bar», - dedi ol.