Qazaqstanda koronavırýs juqtyrǵandardyń 50% astamy jazyldy

NUR-SULTAN. QazAqparat - Qazaqstanda koronavırýske shaldyqqandardyń 50 paıyzdan astamy emdelip shyqty. Bul týraly QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev aıtty, dep habarlaıdy QazAqparat tilshisi.

«Búgingi kúni Qazaqstanda koronavırýs juqtyrýdyń 6 440 jaǵdaıy tirkeldi. 3 256 adam nemese 50 paıyzdan astam jazylyp, úılerine shyǵaryldy. 3 150 patsıent em alyp jatyr. Ótken táýlikte elimizde jańadan 283 jaǵdaı tirkelip, ósim 4,6 paıyz boldy. Bul -aıqyndalǵan ósim aıasynda degen sóz. Olardyń negizgi bóligi - 187 oqıǵa skrınıng arqyly, belsendi izdestirý barysynda anyqtaldy», - dedi ol.

Onyń dereginshe, 283 adamnyń 69-y - koronavırýsqa shaldyqqandarmen baılanysta bolǵandar. 18 jaǵdaıda vırýs - JRVI, tumaý belgilerimen jedel járdemge habarlasqannan keıin anyqtalǵan.

«Aqtóbe men Shyǵys Qazaqstan oblystarynda jańa jaǵdaılar tirkelgen joq. Apta ishindegi ahýaldy alyp qarasaq, 11 mamyrdan 17 mamyrǵa deıin 1 350 naýqas tirkeldi. Ósim qarqyny 2-den 5 paıyzǵa deıingi aralyqta aýytqyp turady. Olardyń 80 paıyzy aldyn alý skrınıngi barysynda anyqtalǵan», - dedi Tımýr Sultanǵazıev.