Qazaqstanda koronavırýs juqtyrǵandardy qandaı preparattarmen emdeýde

NUR-SULTAN. QazAqparat – Qazaqstanda koronavırýs juqtyrǵandardy qandaı dári-dármekpen emdep jatyr? Bul suraqqa Densaýlyq saqtaý mınıstrliginiń Facebook paraqshasynda bergen suhbatynda «SQ-Farmatsııa» JShS-niń basqarma tóraǵasy Berik Shárip jaýap berdi, dep habarlaıdy QazAqparat tilshisi.

«COVID-2019 aýrýy boıynsha dárigerlerimiz vırýsqa qarsy birshama preparattardy paıdalanýda. Onyń biri – alývıa lopınavıry. Ol sonymen qatar VICh-ınfektsııasyn juqtyrǵan patsıentterdiń aǵzasyna qysymdy azaıtý úshin qoldanylady. Jalpy koronavırýs juqtyrǵandardy emdeý úshin Densaýlyq saqtaý mınıstrligi arnaıy klınıkalyq hattamany bekitken bolatyn. Ol hattamaǵa Dúnıejúzilik densaýlyq saqtaý uıymy keńes bergen preparattar da engizildi», - dedi Berik Shárip.

Bul týraly tolyǵyraq málimetti bilý úshin Berik Shárip COVID-2019 aýrýy boıynsha klınıkalyq hattamaǵa bir kóz júgirtip shyǵýǵa keńes beredi.

«Jalpy dáriger retinde aıtar bolsam, koronavırýs ta – vırýstyń bir túri. Sol sebepti aǵzaǵa túsetin vırýstyń qysymyn azaıtý úshin qajetti preparattar qoldanylady. Biz bul preparatty (alývıa lopınavıry) 10 myń adamǵa arnap aqpan aıynyń ózinde daıyndap qoıǵan bolatynbyz. Sonymen qatar koronavırýsqa qarsy aldyn ala gıdroslıhlorıt, hlorıno-fosfattardy ákeldik. Osynyń bári de klınıkalyq hattamaǵa sáıkes emge paıdalanylady», - dedi Berik Shárip.

«SQ-Farmatsııa» JShS-niń basqarma tóraǵasy atalǵan preparattardyń qory bizdiń elde jetkilikti ekenin aıtty.