Qazaqstanda koronavırýs juqtyrǵandar tirkeldi
«Qazirgi tańda bizdiń elimizde epıdemıologııalyq jaǵdaı turaqty. Ótken epıdemıologııalyq maýsymmen salystyrǵanda, jalpy syrqattanýshylyq 14 paıyzǵa tómen. Ár jylda ózderińiz biletindeı, jedel respıratorly ınfektsııa jáne tumaý aýrýlary jeltoqsan aıynyń ortasynda bastalady. Qańtar aıynyń ekinshi jartysynan bastap, ol aýrý kóterilýi múmkin. Bıyl da boljam boıynsha osyndaı jaǵdaı kútilip otyr», - deıdi Jandarbek Bekshın.
Onyń aıtýynsha, qazirgi tańda zerthanalarda tumaýdyń 30 jaǵdaıy tirkelgen.
«2009 jyly búkil eldi, álemdi shýlatqan H1N1 tumaýynyń shtamy bıyl tirkelgen joq. Tumaýǵa uqsas vırýstar tobynyń quramynda koronavırýs Saýd Arabııasyn, Ońtústik Koreıany shýlatyp, qanshama jaǵdaı ólim-jitimmen aıaqtalǵan bolatyn. Ol vırýs bizde de tirkelip otyr. Biraq, olardyń sany óte az. Osy jaǵdaıdy baqylaýdyń arqasynda aldyn alý sharalaryn qolǵa alyp jatyrmyz», - deıdi ol.
Jandarbek Bekshınniń aıtýyna qaraǵanda, Ońtústik Koreıa jáne Saýd Arabııasyna taraǵan koronavırýsty sol elderde 1 myńnan astam adam juqtyrǵan.
«Atalǵan elderde 200 jaǵdaı ólimmen aıaqtaldy. Ońtústik Koreıada 50 jaǵdaıdyń sońy ólimge alyp keldi. Densaýlyq saqtaý salasyna 7,5 mlrd AQSh dollary kóleminde zııan keldi. Bul tumaýǵa uqsas vırýs. Qazirgi tańda jalpy vırýs juqtyrý boıynsha 203 myń jaǵdaı tirkelse, elimizde koronavırýsty juqtyrǵan 3-4 adam tirkeldi. Biraq, ólim-jitim joq. Olar vırýsty shetelden juqtyryp, aýyryp kelgen», - deıdi Jandarbek Bekshın.
Aıta ketsek, koronavırýstyń quramynda vırýstardyń 37 túri bar. Adamǵa, mysyqqa, qusqa, ıtke, iri qara mal men shoshqaǵa juǵýy múmkin. Eń birinshe ret, koronavırýsty juqtyrý jaǵdaıy 1965 jyly tirkelgen.