Qazaqstanda koronavırýs juqtyrǵan 6 adam aýyr jaǵdaıda jatyr - Bas sanıtar dáriger

NUR-SULTAN. QazAqparat – Qazaqstannyń bas memlekettik sanıtar dárigeri Aıjan Esmaǵambetova osy ýaqytqa deıin Qazaqstanda koronavırýs juqtyrǵandarmen baılanysta bolǵan 40 myńǵa jýyq azamattyń anyqtalǵanyn málim etti, dep habarlaıdy QazAqparat tilshisi.

«Qazirgi tańda Qazaqstanda koronavırýs juqtyrǵan azamattardyń 60 paıyzy emdelý úrdisin jeńil jáne aýrý belgisi joq kúıde ótkerýde. 13 adam aýyrlyǵy ortasha kúıde, 21 adam aýyr kúıde jatyr. 6 adamnyń jaǵdaıy asa aýyr dep baǵalanyp otyr», - dedi Aıjan Esmaǵambetova OKQ-da onlaın rejımde ótken baspasóz máslıhatynda.

Onyń aıtýynsha ınfektsııa oshaqtarynan koronavırýs juqtyrǵandarmen baılanysta bolǵan 39 585 adam anyqtalǵan.

«Onyń ishinde 38 693 adam (nemese 98 paıyzy) anyqtalyp, oqshaýlandy. Jalpy sońǵy aptada ınfektsııany juqtyrý deńgeıi 10 paıyz deńgeıinde bolǵan edi. Sońǵy táýlikte bul kórsetkish 8 paıyzdy kórsetti. Jekelegen óńirlerde ınfektsııanyń taralý deńgeıi 20-60 paıyzdyq deńgeıde», - dedi ol.