Qazaqstanda koronavırýs juqtyrǵan 119 adam jansaqtaý bóliminde jatyr

NUR-SULTAN. QazAqparat – Qazaqstanda koronavırýs ınfektsııasyn juqtyrǵan, statsıonarlarda jatqan naýqastardyń 85 paıyzynyń jaǵdaıy qanaǵattanarlyq bolsa, 119-y jansaqtaý bóliminde jatyr. Bul týraly Densaýlyq saqtaý vıtse-mınıstri Lázzat Aqtaeva málim etti, dep habarlaıdy QazAqparat tilshisi.

«Statsıonarlarda 5 795 patsıent bar. Onyń 85 paıyzynyń jaǵdaıy qanaǵattanarlyq. 12,8 paıyzynyń jaǵdaıy – ortasha dárejede. 119 adam jansaqtaý bóliminde», - dedi Lázzat Aqtaeva Densaýlyq saqtaý mınıstrliginiń «Mınıstrlik habarlaıdy» aıdary boıynsha Facebook-ten sóılegen sózinde.

Vıtse-mınıstrdiń málimetinshe, búginge deıin 9 388 adam jazylyp, úıine qaıtqan. Bir táýliktiń ishinde 200 patsıent ońalǵan.

«Juqtyrý ósimi ótken aptada Aqtóbe oblysynda 3,6 ese, Qaraǵandy oblysynda 2,8 ese, Atyraý oblysynda 2,5 ese, SQO-da 2,4 ese, Shymkent qalasy men Aqmola oblysynda 2 ese ósken. Basqa óńirlerde 2 eseden az mólsherde kezdesti», - dedi Lázzat Aqtaeva.

Lázzat Aqtaevanyń aıtýyna qaraǵanda, bir táýlikte Qazaqstanda 23 647 test júrgizilgen.

Aıta ketsek, buǵan deıin Lázzat Aqtaeva qazaqstandyqtardyń jedel járdem qyzmetin jıi shaqyra bastaǵanyn málim etken bolatyn.