Qazaqstanda koronavırýs juqtyrý deregi 16 ese azaıdy

ASTANA. KAZINFORM – Qazaqstanda jyl basynan beri koronavırýs ınfektsııasynyń 6 jaǵdaıy tirkeldi. Bul týraly Ortalyq kommýnıkatsııalar qyzmetinde ótken brıfıngte QR DSM Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova habarlady.

Onyń aıtýynsha, 2025 jylǵy osy kezeńmen salystyrǵanda jaǵdaı 16,3 ese azaıǵan.

– Qazirgi ýaqytta ınfektsııa jeńil ótýde, naýqastar aýrýhanaǵa jatqyzýdy qajet etpeıdi jáne em ambýlatorııalyq jaǵdaıda júrgiziledi. Keıingi monıtorıng nátıjesinde elimizde Omıkronnyń úsh sýbnusqasy aınalymda: XFG.3 – 75%, XFG.3.1 jáne XFG.6 – árqaısysy 12,5%. Bul túrler halyqqa qosymsha qaýip tóndirmeıdi, - dedi komıtet tóraǵasy.

Sarhat Beısenova turǵyndardy aldyn alý sharalaryn saqtaýǵa shaqyrdy.

– Qol gıgıenasyn saqtaý, kópshilik jerlerde qaýipsiz qashyqtyqty ustaný jáne qajet bolǵan jaǵdaıda maska taǵý ınfektsııany juqtyrý qaýpin tómendetedi, - dedi komıtet tóraǵasy.

Osylaısha, Qazaqstanda COVID-19 jaǵdaılary baqylaýda, epıdemıologııalyq jaǵdaı turaqty, biraq qarapaıym saqtyq sharalaryn saqtaý áli de mańyzdy.

Aıta keteıik, osyǵan deıin qyzylshamen aýyrǵandardyń 78%-y ekpe almaǵany týraly jazdyq.