Qazaqstanda koronavırýs taraǵan sátten beri qandaı qylmystar jıi jasaldy
NUR-SULTAN. QazAqparat – QR Іshki ister mınıstrligi Qazaqstanda koronavırýs taraǵan sátten bastap qandaı quqyq buzýshylyqtar jasalǵanyn málim etti, dep habarlaıdy QazAqparat.
Vedomstvo málimeti boıynsha, 26 qylmys túri kópe-kórineý jalǵan aqparat taratýmen baılanysty. Osy ister negizinde Qazaqstan Respýblıkasy Qylmystyq kodeksiniń 274-baby boıynsha sotqa deıingi tergeý bastaldy.
«Mundaı habarlamalar qoǵamda negizsiz úreı men qorqynysh týdyrady. Jalǵan habarlamalar áleýmettik jeliler men messendjerlerge monıtorıng jasaý barysynda anyqtalady, al mundaı habarlardyń avtorlary men taratýshylaryn polıtseıler birden anyqtap, ári qaraı jaýapkershilikke tartady. Almaty, Qaraǵandy jáne Qyzylorda oblystarynyń árqaısynda osyndaı tórt fakti tirkeldi. Úsh retten Qostanaı jáne Túrkistan oblystarynda oryn aldy. Aqtóbe, Aqmola, Atyraý jáne Batys Qazaqstan, Mańǵystaý oblystarynda jáne Shymkent qalasynda bireýden anyqtaldy» dep habarlaıdy mınıstrlik.
Jalǵan aqparat taratqandarǵa, saldarynyń aýyrlyǵyna baılanysty, 1000 AEK mólsherinde aıyppul salýdan 7 jyl merzimge bas bostandyǵynan aıyrýǵa deıingi jaza qarastyrylǵan.
Odan bólek, polıtsııa qyzmeti sanıtarlyq erejelerdi saqtamaǵan adamdardyń da jazaǵa tartylyp jatqanyn aıtady.
«Polıtsııa qyzmetkerleri taǵy 4 fakti boıynsha QR Qylmystyq kodeksiniń 304-baby – sanıtarlyq erejelerdi nemese gıgıenalyq normatıvterdi buzý saldarynan abaısyzda adamdardyń jappaı aýrýy nemese juqtyrýyna ákep soqtyrý boıynsha sotqa deıingi tergeý júrgizýde. Túrkistan oblysynda aýrýhanaǵa jetkizilgen soń karantınge jabylǵan jergilikti turǵyn arýhanadan qashyp ketkeni úshin qylmystyq jaýapkershilikke tartyldy. Nur-sultan qalasynda COVID-19 qorytyndysy rastalǵan áıel jaqyn baılanys jasaǵan adamdar týraly aqparat berýden bas tartty. Taǵy bir fakti 21 naýryzda Kókshetaý qalasynda tirkeldi, onda Mınskiden kelgen azamat karantındik protsedýradan ótýden bas tartqan» delingen habarlamada.
Mundaı qylmystardy jasaǵandarǵa 2000 AEK mólsherinde aıyppul salýdan 10 jylǵa deıingi merzimge bas bostandyǵynan aıyrýǵa deıingi jaza qarastyrylǵan.
Sondaı-aq, TJ rejimin buzǵandar da qatań jazaǵa tartylýda.
«Tótenshe jaǵdaı rejimin buzǵany úshin (QR Ákimshilik quqyq buzýshylyq týraly Kodeksiniń 476-baby) 218 adam ustaldy. Onyń 113-i ákimshilik jaýapkershilikke tartyldy, 10-y qamaýǵa alyndy, 91-ine aıyppul salyndy, 12-si eskertý aldy, 105 tártip buzýshyǵa qatysty materıaldar sotqa jiberildi» dep habarlaıdy QR ІІM.
Aıta keteıik, tótenshe jaǵdaı rejımin buzýdyń eń kóp sany Túrkistan oblysynda - 26, Pavlodar oblysynda - 21, Nur-Sultan qalasynda - 18, Shymkent qalasynda jáne Aqtóbe oblysynda 17-den tirkeldi.
Sondaı-aq, Kókshetaý qalasynda 100-den astam adamnyń qatysýymen banket ótkizgeni úshin meıramhana basshysy jaýapkershilikke tartyldy. Nur-Sultan qalasynda saǵat 22:00-den keıin jumysyn jalǵastyrǵan demalys oryndary anyqtaldy.
Sonymen qatar, reıdtik jáne jedel is-sharalar barysynda maskalardy zańsyz tigýdi uıymdastyrý jáne antıseptıkalyq quraldardy daıyndaý faktileriniń joly kesildi. Atalǵan buıymdarǵa degen suranysty paıdalana otyryp, tártip buzýshylar turǵyndarǵa joǵary baǵamen satyp alýdy usyndy. Jalpy 3700 medıtsınalyq maska jáne 4892 lıtr dezınfektsııalyq quraldar tárkilendi. Tirkeýsiz jáne ruqsat qujatynsyz kásipkerlik qyzmetpen aınalysqany úshin 6 adam ákimshilik jáne qylmystyq jaýapkershilikke tartyldy.
Qysyltaıań shaqta halyq suranysynyń arqasynda qyrýar paıdaǵa kenelmek bolǵandar da joq emes: «Almaty oblysynyń jergilikti turǵyny 500 000 medıtsınalyq maskany satpaq bolǵan. Polıtsııa qyzmetkerleri zańsyz qyzmettiń jolyn kesti, osylaısha jasandy tapshylyq jasaý jáne alypsatarlyq jolmen baǵany ósirýdiń aldyn aldy».
Qazaqstan Respýblıkasynyń Іshki ister mınıstrligi azamattardy zańdardy saqtaýǵa, resmı aqparat kózderine senýge jáne kez kelgen quqyq buzýshylyq jaýapkershilikke ákep soqtyratynyn este ustaýǵa shaqyrady.
QR ÁQBtK 57-baby 9-tarmaqshasynyń talaptaryna sáıkes tabıǵı apat nemese basqa da tótenshe jaǵdaılar kezinde ákimshilik quqyq buzýshylyq jasaý ákimshilik quqyq buzýshylyq úshin jaýaptylyqty aýyrlatady.
