Qazaqstanda koronavırýs shyrqaý shegine jetip, qashan tómendeıdi - Birtanov jaýap berdi

NUR-SULTAN. QazAqparat - Sáýir aıynyń ortasyna qaraı koronavırýs ınfektsııasyn juqtyrý derekteri tómendeı bastaýy tıis. Bul týraly QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Tótenshe jaǵdaı rejimin uzartý epıdemıologııalyq jaǵdaıǵa, koronavırýs ınfektsııasyn juqtyrý jaǵdaıyna baılanysty bolady. Biz 15 sáýirge qaraı vırýsqa shaldyǵý tómendeı bastaıdy dep úmittenemiz. Mundaı jaǵdaıda sheshimdi Memleket basshysy qabyldaıtyn bolady. Biz memlekettik komıssııada kún saıyn bul ahýaldy qarastyryp otyramyz. Degenmen, jaǵdaı teris órbıtin bolsa, onda tótenshe jaǵdaı rejiminiń uzartylatyndyǵy sózsiz», - dedi mınıstr vedomstvonyń Facebook-tegi paraqshasynda «Densaýlyq mınıstrligi habarlaıdy...» degen aıdarmen jarııalanǵan vıdeoda.

Onyń atap ótýinshe, boljamǵa sáıkes, sáýir aıynyń alǵashqy on kúninde koronavırýsqa shaldyǵý deregi shyrqaý shegine jetýi múmkin.

«Degenmen, qabyldanǵan karantındik sharalar bizdiń esepteýimizshe aýrýdyń taralýyn shamamen 50 paıyzǵa tómendetip otyr. Sondyqtan karantındik sharalardy saqtaý barynsha mańyzdy jáne ol munan ary da qatańdatylýy múmkin. Ony keshe Prezıdentimiz de aıtqan bolatyn. Bul ınfektsııanyń taralý jyldamdyǵyn aıtarlyqtaı tómendetýge yqpal etedi», - dedi Eljan Birtanov.