Qazaqstanda koronavırýs shtamyn tekserý jumystary kúsheıtildi

NUR-SULTAN. QazAqparat - QR DSM Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova koronavırýs shtamdaryna qatysty túsinik berdi, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda koronavırýstyń qandaı shtamdary Qazaqstanda anyqtalǵany suraldy.

«Qazaqstanda taralǵan vırýstyń genotıpin tolyq zertteý múmkindigi bar. Pandemııa bastalǵaly 285 shtamm zertteldi, olar naýryz aıynan qańtar aıy aralyǵynda bólingen shtamdar. Sizderdi «mýtatsııalanǵan ońtústikafrıkalyq, brıtandyq jáne jańa brazılııalyq shtamdary bólindi me» degen suraq mazalap turǵany belgili. Maýsym men qańtar aralyǵynda genotıpteý nátıjesinde Qazaqstan aýmaǵynda atalǵan shtamdar anyqtalmady», - dedi A. Esmaǵambetova.

Óz kezeginde QR Densaýlyq saqtaý vıtse-mınıstri Ajar Ǵınııat ońtústikafrıkalyq, brıtandyq jáne brazılııalyq shtammdardy elge kirgizbeý úshin memlekettik shekarada tıisti sharalar qabyldanǵanyn eske saldy.

«Sol sebepti elimizge saparlap kelip jatqan azamattar tıisti tekserýden ótip jatyr. Barlyq óńirlerde shtamdar tekserilip otyr. Qazirgi kezde osy zerthananyń jumysy kúsheıtildi», - dedi vıtse-mınıstr.