Qazaqstanda koronavırýs kúdigimen 80 adam aýrýhanaǵa jatqyzylǵan

NUR-SULTAN. QazAqparat - Qytaımen shekaralas memleketterden kelgen azamattarǵa monıtorıng jalǵasýda. 2020 jyldyń 6 qańtarynan 2 aqpan aralyǵynda elimizge 27 myń 448 adam kelgen, dep habarlaıdy QazAqparat Densaýlyq saqtaý mınıstrliginiń resmı saıtyna silteme jasap.

Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń sanıtarlyq-karantındik pýnktileriniń mamandary Almaty qalasyndaǵy halyqaralyq áýejaıda - 20 myń 613 adamdy, temirjol vokzaldarynda – 399 jolaýshyny tekserdi.

«JRVI belgilerimen 80 adam kópshilikten oqshaý aýrýhanaǵa jatqyzyldy, onyń 39-y jazylyp shyqty. Qazir statsıonarlarda 41 adam qaldy. Aýrýhanaǵa jatqyzylǵandardyń barlyǵynyń synamasy qosymsha baqylaý úshin Almatydaǵy Aıqymbaev atyndaǵy asa qaýipti juqpaly aýrýlardyń ulttyq ǵylymı ortalyǵyna jiberildi. Bul ortalyq jańa koronavırýsty PTR-dıagnostıkalaý ádistemesin ıgergen» delingen habarlamada.

Respýblıkada terapııa úshin qajetti dári-dármek pen medıtsınalyq buıymdar bar, juqpaly aýrýhanalardy oqshaýlaýǵa arnalǵan bokstar, arnaıy dárigerlik jáne orta medıtsınalyq personal daıyndalǵan.

Aıta ketý kerek, bul jaǵdaı QR Densaýlyq saqtaý mınıstrliginiń turaqty baqylaýynda.

Resmı aqparatty Densaýlyq saqtaý mınıstrliginiń Facebook paraqshasynan oqı alasyz jáne kez kelgen suraq boıynsha táýlik boıy jumys isteıtin 1406 baılanys ortalyǵyna qońyraý shalýǵa bolady.