Qazaqstanda qorytyndy attestatsııany ótkizý tártibi belgili boldy
ASTANA. KAZINFORM — Bıylǵy oqý jylynyń bastalýy men aıaqtalý merzimi, sondaı-aq qorytyndy attestatsııany ótkizý tártibi Qazaqstan Respýblıkasy Oqý-aǵartý mınıstriniń buıryǵymen bekitildi. Bul týraly vedomstvonyń baspasóz qyzmeti málim etti.
— 9-synyp oqýshylary úshin qorytyndy emtıhandar 2025 jylǵy 29 mamyr men 10 maýsym aralyǵynda ótedi. Olar mindetti pánder boıynsha tórt jazbasha emtıhannan tapsyrady. 11-synyp túlekterine arnalǵan memlekettik emtıhandar 2025 jylǵy 30 mamyr men 16 maýsym aralyǵynda ótedi. Oqýshylar bes emtıhan tapsyrady, onyń biri aýyzsha túrde ótkiziledi, — delingen habarlamada.
Negizgi jáne jalpy orta bilim týraly attestattardy tapsyrý saltanaty bilim berý uıymdarynda 18-20 maýsym aralyǵynda ótetini belgili bolyp otyr.
Buǵan deıin habarlanǵandaı, Nazarbaev zııatkerlik mektepterinde oqý quny arzandatyldy.