Qazaqstanda qorǵanys-ónerkásip keshenin damytý qory qurylady

ASTANA. QazAqparat - Qazaqstanda qorǵanys-ónerkásip keshenin damytý qory qurylýy yqtımal. Bul týraly búgin QR Parlamenti Májilisinde «Qorǵanys ónerkásibi jáne memlekettik qorǵanystyq tapsyrys týraly» zań jobasyn tanystyrǵan elimizdiń Qorǵanys jáne aeroǵarysh ónerkásibi mınıstri Beıbit Atamqulov aıtty, dep habarlaıdy QazAqparat.

«Qorǵanys-ónerkásip keshenine kiretin sýbektilerdiń aıasyn belgileý usynylady. Olarǵa qatysty qarjylyq, aqparattyq-konsýltatsııalyq, syrtqy ekonomıkalyq jáne kadrlyq memlekettik qoldaý sharalary kórsetilýi múmkin. Memlekettik qoldaý kórsetý sharalary qorǵanys-ónerkásip kesheniniń memlekettik, kvazımemlekettik jáne jekemenshik nysanyndaǵy kez kelgen otandyq uıymyna qoldanylatyndyǵyn atap ótkim keledi», - dedi ol.

Beıbit Atamqulovtyń dereginshe, 2017 jyly áskerı maqsattaǵy ónimder eksportynyń kólemi 2 ese artyp, mundaı ónimder óndirisi 14 paıyzǵa ósim kórsetken. Mundaı nátıjege qorǵanys-ónerkásip salasyna jeke ınvestorlardyń kelýiniń arqasynda qol jetkizilip otyr.

«Otandyq ǵylymı-tehnıkalyq ázirlemelerdi qarjylaı qoldaý jáne saladaǵy uıymdardy jańǵyrtý maqsatynda zań jobasynda Qorǵanys-ónerkisip keshenin damytý qoryn qurý múmkinshiligi qarastyrylǵan. Zań jobasynyń atalǵan normasyn júzege asyrý úshin Úkimettiń atalǵan qordy qurý týraly qaýlysynyń jobasy da ázirlengen. Sonymen qatar qordy qurý jónindegi ınvestıtsııalyq usynystar men salalyq qorytyndy da daıyn», - dedi mınıstr.