Qazaqstanda qorǵanys salasyna arnalǵan ınnovatsııalyq IT alańy iske qosyldy
ASTANA. KAZINFORM — Qazaqstan Respýblıkasynyń Qorǵanys mınıstri avıatsııa generaly-leıtenanty Dáýren Qosanov Armııa úıi bazasynda Defense Tech IT Park qorǵanys tehnologııalary ortalyǵyn ashty. Bul týraly vedomstvonyń baspasóz qyzmeti málim etti.
Bul ınnovatsııalyq alań Qarýly kúshter men ulttyq qaýipsizdik júıesi múddesi úshin otandyq tehnologııalyq sheshimderdi ázirleý men engizý maqsatynda qurylǵan. Freedom Holding Corp. qoldaýymen qurylǵan jobanyń tanystyrylymyna Jasandy ıntellekt jáne tsıfrlyq damý vıtse-mınıstri Dmıtrıı Mýn, Freedom Holding Corp. kompanııasynyń bas atqarýshy dırektory Tımýr Týrlov, sondaı-aq IT-ındýstrııa jáne ǵylymı qaýymdastyq ókilderi qatysty.
Defense Tech IT Park — bul Qorǵanys mınıstrliginiń 2022 jyldan bastap júzege asyryp kele jatqan Defense Tech bastamasynyń damý kezeńderiniń biri. Ol ásker men qaýipsizdik júıesiniń qajettiligi úshin ulttyq ınnovatsııalyq ekojúıeni qalyptastyrýǵa baǵyttalǵan. Jobany ázirleýshiler jańa alańnyń múmkindikterin kórsetip, otandyq IT-kompanııalar men startap-komandalardyń tsıfrlyq tehnologııalar, beınebaqylaý júıeleri, derekterdi taldaý, telekommýnıkatsııalar jáne jasandy spýtnıktik sheshimder salasyndaǵy ınnovatsııalyq jobalardy tanystyrdy.
Qorǵanys mınıstri avıatsııa generaly-leıtenanty Dáýren Qosanov ortalyqtyń qurylýy elimizdiń tehnologııalyq áleýetin nyǵaıtýǵa jáne zamanaýı ázirlemelerdi áskerge jyldam engizýge baǵyttalǵanyn atap ótti.
— Búgingi tańda memlekettiń qorǵanys qabileti tikeleı tehnologııalyq damýǵa baılanysty. Bizdiń basty mindetimiz — óz ıdeıalarymyzdy áskerge praktıkalyq turǵyda engizý jolyn qysqartý, — dedi qorǵanys vedomstvosynyń basshysy.
Óz kezeginde Freedom Holding Corp. kompanııasynyń bas atqarýshy dırektory Tımýr Týrlov jańa alań tehnologııalar men qorǵanys ázirlemeleri salasyndaǵy jas mamandar úshin tartymdy ortalyqqa aınalatynyn atap ótti.
— Biz munda Defense Tech Hub tehnologııalyq bilim berý alańyn qurdyq. Bul jerde ІT salasyndaǵy stýdentter, onyń ishinde áskerı kafedralarda bilim alyp júrgender, praktıkalyq daǵdylaryn jetildirip, hakatondar men akseleratsııalyq baǵdarlamalarǵa qatysa alady, — dedi óz sózinde.
Qorǵanys mınıstriniń tsıfrlyq damý máseleleri jónindegi orynbasary Darhan Ahmedıev Defense Tech IT Park bolashaqta perspektıvalyq tehnologııalyq jobalardy izdeý jáne tańdaý, ázirleýshilerdi ıdeıadan prototıp jasaýǵa deıin qoldaý jáne sheshimderdi áskerde pılottyq engizýge daıyndaý alańy bolatynyn atap ótti. Jańa platforma qorǵanys vedomstvosy, ǵylymı uıymdar jáne tehnologııalyq bıznes arasyndaǵy júıeli ózara árekettestikti qalyptastyrýǵa, sondaı-aq Qazaqstannyń qorǵanys jáne qaýipsizdik múddesi úshin ınnovatsııalardy jedel engizýge múmkindik beredi.
Buǵan deıin Almaty garnızonynda Sarbaz+ iske qosyldy.
