Qazaqstanda Koreıamen birlesken teleserıaldar túsirilýi múmkin
ALMATY. Qarashanyń 25-i. QazAqparat /Erbol Azanbek/ - Aldaǵy ýaqytta koreıalyq «JM Net» medıa kompanııasy men qazaqstandyq «Arna medıa» ulttyq aqparat holdıngi birikken teleserıal túsirýi múmkin. Bul týraly búgin Almatyda eki medıaholdıngtiń basshylarynyń kezdesýi barysynda aıtyldy,
dep habarlaıdy QazAqparat.
Buǵan deıin eki tarap kezdesip, áriptestik týraly memorandýmǵa qol qoıǵan bolatyn. Onda birneshe birikken jobalardy júzege asyrý kózdelgen. Bul jobalardyń alǵashqysy birlesken teleserıaldar túsirýdi qazaqstandyq tarap memorandýmǵa qol qoıý barysynda usynǵan. «Alǵashqy kezdesý barysynda biz Qazaqstanǵa jer aýdarylǵan káris otbasynyń ómiri týraly teleserıal túsirýdi koreıalyq áriptesterimizge usynǵan bolatynbyz. Bul baǵytta qazaqstandyq rejısserler Lavrentıı Sonnyń stsenarııi negizinde kórkem fılm túsirýdi bastap ketipti. Biraq biz bul baǵytta óz oıymyzdy júzege asyrýǵa talpynamyz», dedi «Arna medıa» ulttyq aqparat holdınginiń basqarma tóraǵasy Erlan Baıjanov.
Koreıalyq «JM Net» medıaholdınginiń vıtse-prezıdenti Kım Sý Gııanyń aıtýynsha, bul baǵytta stsenarıı daıyndaý, akterlerdi tańdaý sııaqty birqatar daıyndyqtar kerek. Eki tarap bul baǵytta eki jaq mamandarynyń qatystyrylýymen arnaıy kezdesetin bolyp kelisti. Al Qazaqstan tarapy usynǵan «Arna medıaǵa» qarasty kompanııalardyń mamandaryn tájirıbeden ótkizýge koreıalyq qonaqtar daıyn ekendikterin bildirdi. «Biz qazaqstandyq mamandarǵa jańa tehnologııamyz ben mamandarymyzdyń tájirıbesin úıretýge daıynbyz», dedi Kım Sý Gııa. Ol sondaı-aq birlesken jýrnal shyǵarýdy da qoldap, júzege asyrýǵa daıyn ekendikterin jetkizdi.
«Bizdiń megaholdıngtiń basshylyǵy Qazaqstan men Koreıa arasyndaǵy áriptestikti jaqsy baǵalaıdy. Biz úshin Ortalyq Azııa elderimen, ásirese Qazaqstamen jumys isteý óte mańyzdy», dedi Kım Sý Gııa.
