Qazaqstanda koreı tehnologııasymen balmuzdaq óndirisi iske qosylady
ASTANA. KAZINFORM — Qazaqstanda koreı tehnologııasymen balmuzdaq óndirý jolǵa qoıylady. Bul baǵytta «Shın-Laın», Aýyl sharýashylyǵy mınıstrligi jáne Ońtústik Koreıanyń Sungwon Machinery Co., Ltd. kompanııasy úshjaqty yntymaqtastyq týraly memorandýmǵa qol qoıdy. Joba aıasynda óndiris jańǵyrtylyp, koreı úlgisindegi jańa balmuzdaq túrlerin shyǵarý josparlanyp otyr. Bul týraly AShM málim etti.
Memorandým ozyq azııalyq tehnologııalardy Qazaqstanda engizýge, óndiristik qýattardy damytýǵa jáne koreı úlgisindegi balmuzdaq túrlerin shyǵarýdy jolǵa qoıýǵa baǵyttalǵan.
Kelisim aıasynda taraptar tehnologııalyq jáne ınjenerlik yntymaqtastyqty odan ári damytýdy josparlap otyr.
«Shın-Laın» seriktestigi bazasynda «Shın-Laın Injınırıng» kompanııasy qurylady. Jańa kompanııa zamanaýı óndiristik tehnologııalardy engizý, jetildirý jáne qazaqstandyq óndiris jaǵdaıyna beıimdeý baǵytynda jumys isteıtin ortalyqqa aınalmaq.
Yntymaqtastyq aıasynda balmuzdaq óndirýge arnalǵan avtomattandyrylǵan sheshimder engiziledi. Atap aıtqanda, qurǵaq glazýrleý (Dry Coater) tehnologııasy, joǵary dáldikte jumys isteıtin sorǵy stantsııalary jáne Summer Crunch serııasyndaǵy óndiristik keshender qoldanylady.
Ońtústik Koreıa tarapynyń ınjenerlik sheshimderi men tájirıbesin paıdalaný óndiris úderisterin jańǵyrtyp qana qoımaı, jańa tehnologııalardy ıgerýge, kásiporynnyń óz ınjenerlik áleýetin qalyptastyrýǵa jáne qosylǵan quny joǵary jańa ónim túrlerin shyǵarýǵa jol ashady.
Aýyl sharýashylyǵy mınıstrligi óz tarapynan jobaǵa aqparattyq jáne konsýltatsııalyq qoldaý kórsetedi. Sonymen qatar memlekettik organdarmen ózara is-qımyl jasaýǵa járdemdesip, tamaq ónerkásibindegi ınvestıtsııalyq belsendilikti yntalandyrýǵa arnalǵan memlekettik qoldaý sharalary týraly aqparat beredi.
«Biz zamanaýı óndiristik tehnologııalardy engizý jáne damytý baǵytynda jumys isteıtin „Shın-Laın Injınırıng“ kompanııasyn quryp jatyrmyz. Bizdiń maqsatymyz — Qazaqstanǵa koreılik tájirıbeni ákelip, óz ınjenerlik áleýetimizdi qalyptastyrý jáne halyqaralyq joǵary standarttarǵa saı keletin jańa ónimder shyǵarý. Biz tehnologııalyq áleýeti myqty seriktesti tańdadyq. Bul yntymaqtastyq uzaq merzimdi nátıjege jetkizedi dep senemiz», — dedi «Shın-Laın» JShS prezıdenti Andreı Shın.
Úsh jylǵa josparlanǵan bul yntymaqtastyq Qazaqstannyń tamaq ónerkásibinde ónimdi tereń óńdeýdi damytýǵa, sheteldik tehnologııalardy tartýǵa, otandyq ınjenerlik áleýetti arttyrýǵa jáne qazaqstandyq brendterdiń eksporttyq múmkindikterin keńeıtedi.
Aıta keteıik, Qazaqstanda balmuzdaq óndirisi 47,4% ósti.
