Qazaqstanda koreı kınosynyń festıvali bastaldy
ASTANA. QazAqparat - Elordadaǵy «Kerýen» saýda oıyn-saýyq ortalyǵynda koreı kınosynyń jyl saıynǵy festıvaliniń ashylý saltanaty ótti.
Saýda ortalyǵynyń úshinshi ǵımaratynda bolǵan shara barysynda qonaqtar koreılerdiń «Pıbımpab» taǵamynyń dámin tatty. Bul taǵam adam densaýlyǵyna paıdasy óte zor as máziri sanalady. Ony daıyndaýǵa kúrish, kókónis, túrli askók, teńiz baldyry, et, jumyrtqa paıdalanylady.
Bul sharaǵa oraı Koreıadan Koreı aspazdyq qaýymdastyǵynyń ókilderi arnaıy kelip, olar kórermenderdiń kóz aldynda pıbımpabany ázirledi. Sodan keıin kelýshiler odan dám tatty.
Aǵymdaǵy jyly koreı kınosy festıvali Astana, Qaraǵandy, Qostanaı jáne Shymkent qalalarynda ótedi. Kıno festıvalde koreılik kınematografııanyń 4 týyndysy kórsetiledi. Kórermender «Oýshenniń 12 dosy» atty amerıkandyq fılm negizinde túsirilgen «Urylar» kınosyn tamashalaı alady. Fılm sanult ókilderiniń qurylǵan kásibı urylardyń Makaoda tarıhı tonaýǵa bel býǵandyǵy jaıynda syr shertedi.
Al «Qanisherdiń moıyndaýy» trılleri 15 jyl burynǵy birneshe adam ólimine qatysty qylmysty polıtsııa qyzmetkerleriniń qaıta tergeýi jaıynda. Tergeýge olar atalǵan qylmystardyń qalaı jasalǵandyǵy týraly jazǵan kitap shyqqannan keıin barady.
Sonymen qatar festıval aıasynda «Dýresorı: Shyǵys daýysy» atty mýzykalyq drama da kórsetiledi. Tórtinshi fılm - «Barlyǵy da meniń áıelim jaıynda» dep atalatyn romantıkalyq komedııa. Týyndyda áıelimen ajyraspaq bolǵan azamattyń ózi áıelin kináli qylyp shyǵý úshin oǵan kóńildes jaldaıtyndyǵy jaıynda aıtylady.
Fılmderdiń alǵashqy kórsetilimi qazannyń 10-11 kúnderi elordadaǵy «Kinopark 7» («Kerýen») kınoteatrynda ótedi. Al 16-17 qazan kúnderi Qaraǵandyda «Kinoplexx 3D (K)» («City Mall») kınoteatrynda bolady. Qazannyń 31-i men qarashanyń 1-inde qostanaılyqtar «Qazaqstan 3D» kınoteatrynan koreı týyndylaryn tamashalaı alady. Festıval 7-8 qarasha kúnderi Shymkenttegi «Kinopark 5» («MEGA-Shymkent») kınoteatrynda aıaqtalady.
