Qazaqstanda koreı kapıtaly bar 1 myńnan astam birlesken kásiporyn jumys isteıdi - Prezıdent
ASTANA. KAZINFORM – Prezıdent Koreıa Respýblıkasynyń Premer-mınıstrimen kezdesti, dep habarlaıdy Aqorda.
Qasym-Jomart Toqaev Han Son Sýkty Koreıa Úkimetiniń basshysy bolyp taǵaıyndalýymen quttyqtap, asa jaýapty qyzmetine tabys tiledi.
– Búginde qazaq-koreı qarym-qatynastary turaqty túrde jaqsy damyp kele jatyr. Strategııalyq áriptestigimizdiń aıasynda qos tarap úshin de paıdaly bolatyn kóptegen mańyzdy bastamalar júzege asyrylýda. Sizdiń elińiz Qazaqstannyń on iri saýda jáne ınvestıtsııalyq seriktesiniń qataryna kiredi. Qazaqstanda koreı kapıtaly bar 1 myńnan astam birlesken kásiporyn jumys isteıdi. Biraq aldymyzda turǵan jaýapty mindet óte kóp. Sizdermen birge josparlarymyzdy oıdaǵydaı iske asyramyz dep oılaımyn, – dedi Qazaqstan Prezıdenti.
Memleket basshysy Qazaqstanda ońtaıly iskerlik jáne ınvestıtsııalyq klımat jolǵa qoıylǵanyn atap ótti.
– Elimizde Koreıanyń iri korporatsııalarymen qatar, shaǵyn jáne orta bıznes ókilderiniń kásippen aınalysýyna qolaıly jaǵdaı jasalǵan. Osy baǵytta qazaq-koreı úkimetteri qajetti sharalardy atqaryp jatyr. Atap aıtqanda, Saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııa, sondaı-aq Іskerlik keńes tıimdi jumys istep keledi. Sonymen qatar qajetti quqyqtyq negiz qalyptasqan, – dedi Qasym-Jomart Toqaev.
Prezıdent Premer-mınıstrge qazaq-koreı kásipkerleriniń dóńgelek ústeline qatysqany úshin alǵys aıtty.
Memleket basshysy jıyn aıasynda qol qoıylatyn mańyzdy qujattar ekijaqty yqpaldastyqty odan ári tereńdete túserine senim bildirdi.
Qasym-Jomart Toqaev Prezıdent Lı Chje Meńmen júrgizetin kelissózderdiń mańyzyna erekshe nazar aýdardy. Bul kezdesý ekijaqty qarym-qatynastar tarıhyndaǵy jańa kezeńge jol ashady.
Budan bólek, Qasym-Jomart Toqaev úkimetter arasyndaǵy yqpaldastyqtyń basym baǵyttaryna toqtaldy.
– Kún tártibinde ekijaqty taýar aınalymyn eki ese arttyrý mindeti tur. Ol úshin kólemdi ulǵaıtyp qana qoımaı, saýdanyń qurylymyn ózgertip, qosylǵan quny joǵary taýarlar nomenklatýrasyn keńeıte túsý qajet. Sondyqtan Qazaqstan men Koreıanyń saýda-ekonomıkalyq jáne ınvestıtsııalyq yntymaqtastyǵynyń 2027-2030 jyldarǵa arnalǵan keshendi baǵdarlamasyn ázirleý óte ózekti dep bilemin. Sonymen qatar lokalızatsııalaý jáne ónimdi úshinshi naryqqa shyǵarý boıynsha perspektıvti jobalardy qamtı otyryp, óndiristik kooperatsııanyń jeke jol kartasyn daıyndaý mańyzdy dep sanaımyn, – dedi Prezıdent.
Sóz sońynda Memleket basshysy Qazaqstannyń Koreıamen yntymaqtastyqty jan-jaqty nyǵaıtýǵa beıil ekenin rastady.
Premer-mınıstr Han Son Sýk Koreıa Respýblıkasy ózara baılanystardy odan ári tereńdetýge múddeli ekenin aıtty
– Prezıdent myrza, Sizben júzdesý – men úshin zor mártebe. Ózińiz atap ótkendeı, Qazaqstan Koreıa Respýblıkasynyń Ortalyq Azııadaǵy iri saýda jáne ınvestıtsııalyq seriktesi sanalady. Osy sammıt aıasynda eki el arasyndaǵy yntymaqtastyq, ásirese, ekonomıka, energetıkalyq tasymal tizbegi baǵyttarynda jandana túsedi dep úmittenemin. Sondaı-aq Koreıa Alataý qalasyn damytýda Qazaqstannyń áleýetti seriktesteriniń biri bolady dep oılaımyn, – dedi Koreıa Respýblıkasynyń Úkimet basshysy.
Premer-mınıstrdiń aıtýynsha, ekijaqty qarym-qatynasqa ekonomıkalyq bastamalar ǵana emes, sonymen qatar qarqyn alǵan mádenı-gýmanıtarlyq baılanystar jáne azamattardyń barys-kelisiniń kóbeıýi de erekshe serpin berip otyr.
Kezdesý barysynda kólik-logıstıka, asa mańyzdy materıaldar, mashına jasaý, tsıfrlandyrý jáne jasandy ıntellekt pen medıtsınany damytý salalaryndaǵy birlesken jobalardy iske asyrý jospary talqylandy.
Aıta keteıik, koreıalyq KIND kompanııasy Alataý qalasyn damytýǵa qatysýy múmkin.
