Qazaqstanda kópirlerdi jobalaýdyń jańa talaptary kúshine endi
ASTANA. KAZINFORM – Qazaqstanda uzyndyǵy 100 metr jáne odan asatyn kópirlerdi jobalaý kezinde tsıfrlyq aqparattyq modeldeý tehnologııalaryn qoldaný mindetteldi. Aldaǵy jyldary bul talap avtomobıl joldary men basqa da qurylys nysandaryna engiziledi, dep habarlaıdy «QazjolǴZI» AQ.
2026 jylǵy 1 tamyzdan bastap kúshine engen jańa talap Ónerkásip jáne qurylys mınıstriniń 19 naýryzdaǵy buıryǵyna sáıkes engizilgen. Bul qurylys salasyn BIM (Building Information Modeling) tehnologııalaryna kóshirýdiń alǵashqy kezeńi sanalady.
Jospar boıynsha 2028 jylǵy 1 qańtardan bastap BIM tehnologııalaryn qoldaný I jáne II sanattaǵy avtomobıl joldaryn jobalaý kezinde de mindetti bolady.
Al 2030 jylǵy 1 qańtardan bastap bul talap jaýapkershiligi úshinshi deńgeıdegi obektilerdi qospaǵanda, barlyq qurylys nysanyna qoldanylady.
– 2026 jylǵy 1 tamyzdan bastap Qazaqstanda uzyndyǵy 100 metr jáne odan asatyn kópirlerdi jobalaý kezinde aqparattyq modeldeýdi qoldaný mindetti boldy, – dep málimdedi ınstıtýt.
Osy baǵytta «QazjolǴZI» avtomobıl joldarynda BIM tehnologııasyn qoldanýǵa arnalǵan vedomstvolyq erejeler jınaǵyn ázirledi.
Instıtýttyń aqparattyq modeldeý tehnologııasymen daıyndaǵan alǵashqy jobasy – Oral qalasyndaǵy kópir ótkeli men oǵan kireberis joldardyń jumys jobasy. Qazir qujattar «Memsaraptama» respýblıkalyq memlekettik kásipornynda qaralyp jatyr.
Sonymen qatar kópirlerdiń tehnıkalyq jaı-kúıin tekserýge jańa tsıfrlyq ádister engizilýde.
Mamandar LiDAR tehnologııasynyń kómegimen áýeden jáne jerden lazerlik skanerleý, sondaı-aq fotogrammetrııa ádisterin paıdalanyp, kópirlerdiń úshólshemdi modelderin jasaıdy.
Bul tehnologııalar kópirlerdiń geometrııalyq ólshemderi men tehnıkalyq jaı-kúıi týraly naqty derekter alýǵa múmkindik beredi.
Jınalǵan aqparat «QazjolǴZI» ázirlegen kópirlerdi paıdalanýdy basqarý júıesine engiziledi. Onda árbir nysannyń sıpattamasy, tekserý nátıjeleri jáne qazirgi tehnıkalyq jaǵdaıy saqtalady.
Budan bólek, ınstıtýt I-V sanattaǵy avtomobıl joldaryn ortasha jóndeý kezinde jol tósemderin kúsheıtýge arnalǵan úlgilik konstrýktsııalar jobasyn ázirledi.
Sondaı-aq Polshanyń Joldar men kópirler ǵylymı-zertteý ınstıtýtymen birlesken zertteýler júrgizý, pılottyq jobalardy iske asyrý jáne Qazaqstannyń klımattyq erekshelikterine beıimdelgen kópir konstrýktsııalaryn ázirleý josparlanyp otyr.
Aıta keteıik, buǵan deıin «QazjolǴZI» Atyraýdaǵy Ortalyq kópirdiń tsıfrlyq kóshirmesin ázirleýge kirisken edi. Uzyndyǵy 260 metr bolatyn kópirdiń tehnıkalyq jaı-kúıin baǵalaý úshin keshendi tekserý jáne tsıfrlyq modeldeý jumystary júrgizilip jatqany habarlanǵan.
