Qazaqstanda kóp satylǵan jańa kólikterdiń brendteri belgili boldy
NUR-SULTAN. QazAqparat – 2020 jyldyń qańtar-tamyz aılary aralyǵynda Qazaqstanda resmı dılerler 51 myńnan astam jańa kólik satty. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.
«Atalǵan kezeńde resmı dılerler 51 732 kólikti satty. Bul bir jyl burynǵy kórsetkishten 19,1 paıyzǵa joǵary. Bıylǵy segiz aıda qazaqstandyqtar jańa jeńil kólikterdi alýǵa 468,3 mlrd teńge jumsap, 2019 jylǵy deńgeıden 15,7 paıyzǵa artyq boldy», - delingen taratylǵan málimette.
Kólik satyp alýshy 36 274 adam (70,1 paıyzy) otandyq zaýyttardyń ónimine óz tańdaýyn jasaǵan. Sonymen qatar, bıylǵy 8 aıda satylǵan 15 458 avtomobıl (29,9 paıyzy) ımportqa tıesili bolyp otyr.
Atalǵan merzimde elimizde suranysy joǵary brendterdiń arasynda Lada (11 359 kólik), Hyundai (9727), Toyota (6 754 ), Ravon (5 929 ) jáne KIA (4 282) kólikteri kósh bastady.
Munymen qosa, satylymy joǵary bolǵan TOR-ondyqta - Chevrolet (2237 kólik), GAZ (1699), Renault (1677), Volkswagen (1404) jáne Nissan (1387) bar.
