Qazaqstanda kóp satylatyn kólikterdiń tizimi jasaldy
ASTANA. QazAqparat - 2017 jyldyń qańtar-sáýirinde qazaqstandyqtar 273 mln dollar somasynda 11 myń jańa jeńil avtokólikterdi satyp aldy. Bul týraly «QazAvtoÓnerkásip» avtokólik salasyndaǵy kásiporyndar odaǵynyń baspasóz qyzmetiniń málimetinde aıtylǵan, dep habarlaıdy QazAqparat.
Bıyldyń tórt aıynda resmı dılerler 11 018 jeńil jáne jeńil kommertsııalyq kólikterdi satty, bul kórsetkish ótken jylmen salystyrǵanda 23 paıyzǵa tómen. Sáýir aıynda 3 449 avtomobıl satylyp, osy deńgeı 2017 jylǵy naýryzǵa qaraǵanda 27 paıyzǵa joǵarylady.
Kompanııa málimetinde, 4 aıda satylǵan 7 771 kólik ımportqa (70,5 paıyz) tıesili. Sonymen birge 3 247 satyp alýshy (29,5 paıyz) óz tańdaýlaryn qazaqstandyq zaýyttardyń ónimine bergen.
Belgili bolǵandaı, qazaqstandyqtardyń arasynda suranysqa ıe kólikterdiń kóshin Toyota bastap tur, ıaǵnı bıylǵy tórt aıda el aýmaǵynda 2 290 japondyq kóliktiń markasy saýdalandy. Lada dılerleri 1 912 avtomobıldi ótkizgen kórinedi. Sondaı-aq alǵashqy úshtikke Renault enip tur, bul markadan 856 mashına satylǵan eken.
Munymen qosa, ondyqqa Ravon (774 kólik), Hyundai (673), KIA (771 ), Volkswagen (375 ), GAZ (611), UAZ (454), Nissan (403 ) enip otyr.
Modelder arasynda birinshi orynda Toyota Camry tur. Japondyq sedandy 885 satyp alýshy qalaǵan. Suranysqa ıe modelder ishinde Lada 4×4 (605 kólik), Ravon Nexia (576 ), Toyota Rav4 (526 ) jáne Lada Granta (489) bar.
