Qazaqstanda kóp satylatyn kólikter tizimi jasaldy
ASTANA. QazAqparat - 2018 jyldyń bes aıynda Qazaqstanda satylǵan kólikterdiń 47 paıyzdan astamy otandyq avtozaýyttarǵa tıesili. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«2018 jyldyń qańtar-mamyrynda resmı dılerler 20 620 avtomobıl ótkizip, bul kórsetkish byltyrǵa qaraǵanda 40,4 paıyzǵa artyq boldy. Esepti kezeńde qazaqstandyqtar jańa jeńil kólikterdi satyp alýǵa 165,2 mlrd teńge somasynda qarjy jumsady», - delingen taratylǵan málimette.
Atalǵan kezeńde ótkizilgen 10 901 avtokólik (52,9%) ımportqa, al 9 719-y (47,1%) elimizdegi avtozaýyttardyń ónimderine tıesili.
Atap aıtqanda, 5 aıdyń qorytyndysy boıynsha Qazaqstanda suranysqa ıe brendterdiń alǵashqy bestiginiń kóshin Lada (4 695 kólik) bastap tur. Satylǵan kólik sany boıynsha ekinshi orynda Toyota (4 162) turaqtasa, úshinshi orynǵa Hyundai (2 638) shyqty. Sonymen qatar bul bestikke Ravon (1 675) men GAZ (1079) brendteri de endi.
Belgili bolǵandaı, esepti kezeńde jeńil kólikter reıtınginde Toyota Camry (1556 kólik satyldy), Lada Granta (1336) jáne jol talǵamaıtyn Lada 4x4 (1275) alǵa shyǵyp, kóbirek satyldy. Sondaı-aq bul TOP-5 modelder qataryna Ravon Nexia (992) men Hyundai Tucson (774) kirdi.
Atalǵan kezeńde kólik satyp alý jaǵynan aldyńǵy oryndarǵa Almaty (5 339 kólik satyldy), Astana (3 494), Atyraý (1 546), Qostanaı (1 487), Shymkent (1 298), Qaraǵandy (1 242) qalalary shyqty.
