Qazaqstanda kooperatsııaǵa 500 myńnan astam sharýashylyqtar tartylady
ASTANA. QazAqparat - Aldaǵy jyldary óndirýshi men tutynýshy arasynda ónimniń baǵa ústemesin aıtarlyqtaı tómendetýge múmkindik bar.
Bul týraly búgin Parlament Senatynda agroónerkásiptik keshendi damytý taqyrybynda ótken kezdesýde QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.
«Shaǵyn jáne orta sharýashylyqtardy aýyl sharýashylyǵy kooperatsııasyna tartý sharalaryna toqtalatyn bolsaq, jalpy 5 jylda bul kooperatsııaǵa 500 myńnan astam jeke qosalqy jáne shaǵyn fermerlik sharýashylyqtardy tartý josparlanyp otyr»,-dep atap ótti ol.
Atap aıtqanda, kooperatıvter sút, et, kókónis jáne basqa da ónimderdi jınaýmen aınalysady. Sonymen qatar olar qasaphana, veterınarııa, jem-shóp daıyndaý, agrarlyq hımııa, ónimdi qaıta óńdeý men satý nysandaryna deıin jetkizý qyzmetterin ortalyqtandyrylǵan deńgeıde iske asyrady.
«Atalǵan sharalar qaıta óńdeý kásiporyndarynyń júktemesin ortasha alǵanda 30 paıyzǵa arttyrýǵa jáne óndirýshi men tutynýshy arasyndaǵy baǵa ústemesin tómendetýge múmkindik beredi»,-dep túsindirdi birinshi vıtse-mınıstr.
Onyń sózine qaraǵanda, 2017-2021 jyldarǵa arnalǵan agroónerkásiptik keshendi damytý memlekettik baǵdarlamasyn júzege asyrý aıasynda 1 sáýirdegi jaǵdaı boıynsha elimiz boıynsha 335 aýyl sharýashylyǵy kooperatıvteri qurylǵan. Osy rette 150 sút qabyldaıtyn jáne 159 qasaphana birigip, 7 761 otbasylyq bordaqylaý alańdary qurylǵan. Jalpy, bul maqsatqa 50 mlrd. teńge bólindi.
