Qazaqstanda qonys aýdarýdyń óńirlik kvotalary 5 esege artady
ASTANA. QazAqparat - Qazaqstanda óńir boıynsha qonys aýdarýǵa kvotalar 5 esege artady. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.
Vedomstvo basshysynyń atap ótýinshe, bólingen qarjyny eskere otyryp, búginde baǵdarlama aıasynda elimizdiń ońtústiginen soltústik óńirlerine óz erkimen 381 otbasy nemese 1479 adam qonys aýdardy.
«Kelesi jylǵa qonys aýdarýǵa óńirlik kvatalardy 5 esege arttyrý kózdelip otyr, ıaǵnı 1700 otbasyǵa deıin nemese 7 myńǵa jýyq adamdy qamtý eskerilgen», - dep naqtylady T. Dúısenova.
Mınıstr nátıjeli jumyspen qamtýdy jáne jappaı kásipkerlikti damytýdyń baǵdarlamasyna tıisti ózgertýler engizý qajettigin atap ótti. Ózgerister azamattardyń óz erkimen qonys aýdarýyn yntalandyrýǵa qatysty bolyp otyr. Osy maqsatta qonys aýdarýshylardyń ornyǵýyna baılanysty barlyq máselelerdi sheshýdi eskere otyryp, olardy turaqty jumysqa qabyldaýǵa daıyn jumys berýshilerge 450 AEK (1 082 250 teńge) somasynda sýbsıdııa usyný qarastyrylýda.
