Qazaqstanda «qońyr» jáne «jasyl» ekonomıkalar arasyndaǵy teńgerim bolýy tıis

ASTANA. QazAqparat - Qazaqstanǵa tolyqtaı kómirden bas tartýdyń reti joq. Bul turǵyda «qońyr» jáne «jasyl» ekonomıkalar arasyndaǵy balansty aıqyndaý kerek. Búgin elordada «Energııalyq tıimdi TKSh jáne Qazaqstannyń ınnovatsııalyq qurylys ındýstrııasy» V Halyqaralyq konferentsııasynda QR Parlamenti Májilisiniń depýtaty Aıgúl Soloveva osylaı málim etti.

«Qazaqstan salada birqatar básekelestik basymdyqtarǵa ıe. Olardy «jasyl ekonomıka» strategııasy negizinde ǵana júzege asyrýǵa bolady. Bizde jańaratyn energııa kózderi turǵysynda aýqymdy áleýetimiz bar. Ol shamamen 1 trln. kılovatt/saǵatty qurap otyr. Alaıda energııanyń basym bóligi kómir stansalarda óndirilýde. Bizde bul taqyryp boıynsha pikirtalastar boldy jáne onda Qazaqstanda kómirdiń eleýli qory bar ekendigi, sondaı-aq otynnyń bul túri qymbat emestigi aıtyldy. «Qońyr ekonomıkamen qatar «jasyl ekonomıka» bar ekenin túsinýimiz kerek. Bul turǵyda biz teńgerimdi tabýymyz qajet», - dep toqtaldy A. Soloveva.

Osy oraıda depýtat «qońyr ekonomıkanyń» barsha óndiristerin jabý mindetti emes ekenin, ıaǵnı olardy transformatsııalaýǵa bolatyndyǵyn atap ótti.

«Qońyr ekonomıka» - ol eski tehnologııalarǵa negizdelgen ekonomıka ǵana emes. Ekologııalyq sebeptermen barsha óndiristerdi jabýdyń negizi joq, sebebi bul turǵyda revolıýtsııalyq tehnologııalar men ınnovatsııalyq sheshimder bar. Batystyń kompanııalarymen qatar Qazaqstannyń da óndirýshileri osy baǵytta eleýli túrde alǵa jyljydy», - dedi ol.