Qazaqstanda konstıtýtsııalyq deńgeıde tsıfrlyq quqyq bekitilgen – Oljas Bektenov
ShYMKENT. KAZINFORM – Qazaqstan Premer-mınıstri Oljas Bektenov Shymkent qalasynda «Indýstrııa 5.0: Ózara árekettesýdiń kúshi» taqyrybynda ótken Digital Qazaqstan 2026 halyqaralyq tsıfrlyq forýmynda sóz sóıledi. Forýmǵa EAEO elderiniń úkimetteri basshylary, IT-ındýstrııa ókilderi, halyqaralyq kompanııalardyń ókilderi, ınvestorlar men sarapshylardy qosa alǵanda, 3 myńnan astam delegat qatysyp jatyr. Bul týraly Úkimettiń baspasóz qyzmeti habarlady.
Forýmnyń plenarlyq otyrysyn ashqan Qazaqstan Premer-mınıstri Oljas Bektenov jasandy ıntellektini damytýdyń negizgi baǵyttaryn aıqyndady. Atap aıtqanda, ınstıtýtsıonaldyq negiz qalyptastyrý, tsıfrlyq ınfraqurylym jáne adamı kapıtal syndy máselelerge basymdyq berildi.
– Búginde Qazaqstan tsıfrlandyrý men jasandy ıntellekt jańa ekonomıkalyq modeldiń negizine aınalatyn kezeńge qadam basty. Sondyqtan Qazaqstan Prezıdenti Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalap, bul salanyń elimiz úshin aıryqsha mańyzdylyǵyn atap ótti. Bıyl Qazaqstanda aýqymdy saıası reformalar men jańarýlar júzege asyrylyp jatyr. Elimizdiń azamattary jańa Konstıtýtsııany qabyldady jáne onda alǵash ret konstıtýtsııalyq deńgeıde tsıfrlyq quqyqtar bekitildi. Bul salanyń odan ári damýyna eleýli serpin berip qana qoımaı, memlekettiń strategııalyq basymdyqtaryn da kórsetedi. Tsıfrlyq quqyqtardy eń joǵary deńgeıde bekitý biz úshin tsıfrlyq transformatsııa tek tehnologııalardy damytý týraly ǵana emes, sonymen qatar naqty quqyqtyq kepildikter, derekterdi qorǵaý jáne senim prıntsıpteri týraly ekenin aıqyndaıdy. Osylaısha, Qazaqstan tsıfrlyq tehnologııalar men jasandy ıntellektini damytý úshin boljamdy ári turaqty quqyqtyq orta qalyptastyryp jatyr, - dep atap ótti Oljas Bektenov.
Aıta keteıik, Shymkentte EAEO-ǵa qatysýshy elderdiń men baqylaýshy memleketterdiń úkimet basshylary Eýrazııalyq úkimetaralyq keńestiń otyrysyna oraılastyrylǵan Digital Qazaqstan 2026 forýmynyń tsıfrlyq jobalar kórmesine qatysty.
