49 fakt: elimizde «kóńil kóteretin gaz» kontrabandasy áshkerelendi
ASTANA. KAZINFORM — Іshki ister mınıstrligi esirtki qylmysyna qarsy kúresti jalǵastyrady. Bul týraly Polisia.kz jazdy.
— Bıyl 1 qańtardan bastap Qazaqstan Respýblıkasy Qylmystyq kodeksiniń 301-babyna sáıkes kúshti áser etetin zattardyń zańsyz aınalymy úshin qylmystyq jaýapkershilik engizildi. Mundaı zattardyń tizbesine jastar arasynda «kóńil kóteretin gaz» retinde belgili azot oksıdi de engizilgen. ІІM esirtki qylmysyna qarsy is-qımyl komıteti tyıym salynǵan zattardy taratý faktilerin anyqtaý jáne jolyn kesý boıynsha túngi klýbtar men oıyn-saýyq oryndarynda turaqty negizde reıdtik is-sharalar júrgizedi. Jyl basynan beri respýblıka boıynsha 49 fakt tirkelip, 1,5 myńnan astam ballon men eki avtotsısterna tárkilendi. Kórshi memleketten «kóńil kóteretin gazdy» jetkizý arnasy joıyldy. Osy faktilerdiń barlyǵy boıynsha qylmystyq ister qozǵaldy. Kúshti áser etetin zattardyń zańsyz aınalymy úshin sot úkimi de zańdy kúshine endi, onyń sheshimi boıynsha kináli adam segiz jylǵa bas bostandyǵynan aıyryldy. ІІM barlyq azamattardy, ásirese túngi oıyn-saýyq oryndarynyń ıeleri men ákimshilerin azot oksıdin taratýǵa jol bermeýge shaqyrady. Tyıym salynǵan zattardy tasymaldaýǵa, saqtaýǵa jáne ótkizýge qatysy bar barlyq adamdar jaýapkershilikke tartylady. Zań buzýshylarǵa qatysty jazanyń bultartpastyǵy qaǵıdatyn árdaıym este saqtaǵan jón, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Eske sala keteıik, buǵan deıin ІІM 12 tonna janarmaıdy zańsyz áketpek bolǵandardyń jolyn kesti.
