Qazaqstanda Kongo-Qyrym gemorragııalyq bezgegi aýrýy boıynsha jaǵdaı óte kúrdeli - J.Dosqalıev

Bul týraly búgin QR Úkimeti janyndaǵy Densaýlyq saqtaý jónindegi ulttyq úılestirý keńesiniń otyrysynda Densaýlyq saqtaý mınıstri Jaqsylyq Dosqalıev málim etti.

«Elimizde Kongo-Qyrym gemorragııalyq bezgegi aýrýy boıynsha jaǵdaı óte kúrdeli. Qazaqstannyń ońtústigindegi 3 oblysta atalmysh aýrýdyń oshaǵy bar. Iksodty kenelerdiń taralý aýmaǵy barǵan saıyn artyp keledi. Oǵan óziniń obektıvti de sýbektıvti sebepteri bar. Olardyń arasynda aldyn alý sharalardyń tıimsiz bolýy jáne halyqtyń az aqparattandyrylýy bar», - dedi mınıstr.

J.Dosqalıev atap kórsetkendeı, KQGB óte qaýipti indet. Onyń ınkýbatsııalyq kezeńi qysqa bolǵanymen, ol ómirlik mańyzdy aǵzalardy zaqymdaı otyryp óte shapshań qozady. Naýqas úsh kúnniń ishinde dárigerge kórinbegen jaǵdaıda búkil aǵza ýlanyp, onyń arty kóp jaǵdaıda ólimmen aıaqtalady.

Vedomstvo basshysynyń sózine qaraǵanda, KQGB vırýsyn juqtyrǵan adamdy qutqaryp qalý asa qıyn. Sebebi onyń arnaıy emi joq. Degenmen, Qazaqstanda ondaı naýqastardy emdeýdiń tájirıbesi bar. Ásirese, emdi naýqastanýdyń alǵashqy kezeńinde bastaǵan kezde jáne osy aýrýmen buryn aýyrǵan adamnyń qanyn quıǵan jaǵdaıda.

Sondaı-aq J.Dosqalıev, búgingi kúni bul aýrýǵa qarsy bir ǵana mınıstrliktiń kúshimen kúresý jetkiliksiz bolyp otyrǵanyn aıtty. «Densaýlyq saqtaý mınıstrliginiń kúshimen tek qana emdeý júrgizip, ne bolmasa epıdemıologııalyq zertteýlerdi júrgizý jetkiliksiz. Bul máselede Tótenshe jaǵdaılar jáne Aýyl sharýashylyǵy mınıstrlikterimen birlesken keshendi sharalar qajet», - dedi ol.

Aıta keteıik, 2009 jyly respýblıkada KQGB juqtyrýdyń 26 jaǵdaıy tirkelgen bolsa, ústimizdegi sáýir aıynyń ózinde Ońtústik Qazaqstan oblysynda bul indettiń 2 jaǵdaıy tirkelip úlgerdi. Taǵy 435 adam kene shaqqandyǵy týraly shaǵymdanǵan.