Qazaqstanda Kongo-Qyrym qyzbasynyń 22 jaǵdaıy tirkeldi

Endemııalyq óńirlerdegi epıdemıologııalyq ahýal turaqty baqylaýda. Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.

Onyń aıtýynsha, Kongo-Qyrym gemorragııalyq qyzbasy – asa qaýipti tabıǵı oshaqtyq vırýstyq ınfektsııalardyń biri. Aýrýdyń negizgi tasymaldaýshysy – ıksod keneleri. Qazaqstanda onyń tabıǵı oshaqtary Jambyl, Qyzylorda jáne Túrkistan oblystarynda, sondaı-aq Shymkentte bar.

Elimizde bul aýrý jyl saıyn tirkeledi. Orta eseppen jylyna 25–30 jaǵdaı anyqtalady. Kenelerdiń belsendiligi artatyn kezeńde syrqattanýshylyqtyń maýsymdyq ósimi baıqalady.

– Bıyl jyl basynan beri Kongo-Qyrym gemorragııalyq qyzbasynyń zerthanalyq jolmen rastalǵan 22 jaǵdaıy tirkeldi. Endemııalyq óńirlerdegi epıdemıologııalyq ahýal turaqty baqylaýda. Ol jerlerde aýrýdyń aldyn alý jáne taralýyna jol bermeý úshin qajetti profılaktıkalyq jáne indetke qarsy sharalar tolyq kólemde júrgizilip jatyr, – dedi Sarhat Beısenova.

Spıkerdiń sózinshe, sanıtarııalyq-epıdemıologııalyq qyzmet barlyq qolaısyz eldi mekenniń aınalasynda qorǵanysh aımaqtaryn qurǵan. Al veterınarııalyq qyzmet 7,5 mıllıonnan astam aýyl sharýashylyǵy janýaryn jáne mal sharýashylyǵy nysandarynyń 48 mıllıon sharshy metrden astam aýmaǵyn kenege qarsy óńdegen. Qazir óńdeý jumystarynyń ekinshi kezeńiniń kestesi jasalyp jatyr.

Onyń aıtýynsha, ınfektsııa adamǵa juqtyrǵan kene shaqqanda, aýrý juqtyrǵan aýyl sharýashylyǵy janýarlaryn kútý kezinde, sondaı-aq naýqastyń qany nemese basqa da bıologııalyq suıyqtyqtarymen baılanys bolǵanda juǵýy múmkin.

Qaýip tobyna mal ósirýshiler, shopandar, veterınarııa jáne medıtsına qyzmetkerleri jatady.

– Kongo-Qyrym gemorragııalyq qyzbasyna qarsy arnaıy vaktsına joq. Sondyqtan aýrýdyń aldyn alýdyń negizgi joly – jeke qorǵaný sharalaryn saqtaý, janýarlarmen jumys istegende qaýipsizdik talaptaryn qatań oryndaý jáne aýrýdyń alǵashqy belgileri baıqalǵan jaǵdaıda ýaqyt ozdyrmaı medıtsınalyq kómekke júginý. Tabıǵı oshaqtarǵa barǵan kezde nemese aýyl sharýashylyǵy janýarlaryn kútkende qorǵanysh kıimin kıip, deneni jıi tekserip turý jáne jeke bas gıgıenasyn saqtaý qajet. Eger dene qyzýy kóterilip, álsizdik, bas aýrýy nemese basqa da belgiler baıqalsa, sondaı-aq kene shaqqan jaǵdaıda birden dárigerge qaralǵan jón, – dedi Sarhat Beısenova.

Eske salaıyq, buǵan deıin elordada kene shaqqan jaǵdaıda turǵyndardyń qaı medıtsınalyq uıymdarǵa júgine alatyny týraly jazǵan edik.