Qazaqstanda kondıtsıoner men ony ornatý baǵasy qansha
ASTANA. KAZINFORM – Jaz aılarynda aýa baptaǵyshqa suranys arta túsedi. Kazinform agenttiginiń tilshisi kondıtsıoner men ony ornatý qyzmetiniń baǵasyn bildi.
Buryn kondıtsıoner jaıly ómirdiń kórinisi bolsa, búginde ár páter men úıde, jumys ornynda negizgi quraldyń birine aınaldy. Ystyq adamdy álsiretip, jumysqa degen qabiletin tómendetedi. Keıde júrek-qan tamyrlary aýrýy bar adamdarǵa qaýipti. Eresek te, bala da úı ishiniń tymyrsyq emes, qalypty bolǵanyn qalaıdy. Mundaıda aýa baptaǵysh kondıtsıonerdiń kómegi kóp.
Baǵa kondıtsıonerdiń qýaty men taýar óndirýshi kompanııanyń ataýyna, qosymsha múmkindikterine baılanys ózgerip otyrady. Eger kondıtsıoner qondyratyn bólmeniń aýdany úlken bolsa, baǵa da soǵurlym joǵarylaı beredi. Aýdany 20-25 m², 25-50 m² jáne 70 m² dep ózgerse, quny satylap kóteriledi.
Kópke málim óndirýshiler qýat únemdeıtin nusqalaryn usynady. Baǵasy da ózgege qaraǵanda joǵary bolady.
Baǵaǵa kondıtsıonerdiń túri de áser etedi. Keń tanylǵany ári qoljetimdisi qabyrǵaǵa ilýge arnalǵany. Sonymen birge bólme ishinde turatyn jáne birneshe bólmeni qamtýǵa múmkindik beretin júıemen jumys isteıtin aýa baptaǵyshtar bar. Keıbir kondıtsıonerdiń birneshe fýntsııasy (aýa tazartý, ıondaý, Wi-Fi arqyly basqarý, jylytý) bolsa, baǵasy joǵary degen sóz.
Al qondyrý baǵasyna birneshe faktor áser etedi. Olar: páterdiń qabaty, qabyrǵanyń qalyńdyǵy jáne kommýnıkatsııanyń qoljetimdiligi. Eger alpınıst nemese kran kerek bolsa, baǵa kóteriledi.
Kondıtsıoner satatyn kásipkerler birneshe qosymsha qyzmet usynady. Máselen Oral qalasynda kondıtsıonerdi tazartý quny 5 000 teńgeden bastalady. Al 100 gramm freon quıý qyzmeti 2 000 teńge bolsa, jóndeý qyzmeti 10 000 – 15 000 teńge jáne odan joǵary.
Qostanaı qalasynda da tehnıkalyq qyzmet kórsetý baǵasy dál osyndaı. Freon quıyp berse qyzmeti 3 000 teńgeden bastalady. Eski kondıtsıonerdi sheship alý qyzmeti – 12 000 – 15 000 teńge. Joǵary qabatqa minip, sheshý qyzmeti bólek tólenedi. Kóbine krandy saǵatyna 12 000 teńgege jalǵa alady.
Astana qalasynda kondıtsıoner ornatý, onyń ishinde qabyrǵany burǵylap tesý, ishki jáne syrtqy montaj, freonǵa arnalǵan tútik salý (uzyndyǵy 3-5 metr bolady), ony bekitý bir qyzmet túri. Al ózge qyzmetke bólek tólenedi.
Kókshetaý qalasynda kondıtsıoner ornatatyn qabyrǵa yńǵaıly orynda bolsa, qyzmet baǵasy qalypty. Al eger kommýnıkatsııa júrgizý kezinde qosymsha shyǵyn qajet bolsa, máselen freon júretin jolaqtyń ár metrine qosymsha 8 000 teńge tóleýge týra keledi. Oǵan eki mys qubyr, jylý oqshaýlaý materıaly, kondensat aǵatyn tútik, kabel men orama qajet bolady. Qabyrǵany oıyp, kommýnıkatsııa júrgizý qyzmeti de aqyly. Kókshetaýda bul qyzmettiń túri 30 000 teńge jáne odan joǵary. Baǵaǵa materıal sapasy men qabyrǵanyń neden qalanǵany áser etedi. Avtosaty qyzmetiniń quny 10 000 teńge jáne odan joǵary. Jýý jáne tehnıkalyq qyzmet baǵasy 25 000 teńge, freon quıý quny 15 000 teńge jáne odan joǵary.
Kókshetaýlyq qyzmet kórsetýshilerdiń aıtýynsha, kondıtsıonerdi 70 000 – 2 000 000 teńgege satyp alyp, ornatýǵa bolady. Bir eskeretin jaıt bar. Munda quny 70 000 – 80 000 teńge bolatyn kondıtsıonerdi tek aktsııa jáne jeńildik kezinde satyp alýǵa bolady. Baǵasyna saı qýaty da tómen. Al negizi kondıtsıoner baǵasy 90 000 teńge jáne odan joǵary. Premıým sapadaǵy aýa baptaǵysh quny 2 000 000 teńgege jetti. Bul kondıtsıonerdiń qýattylyǵy joǵary, álemdik brendter usynatyn taýar bólmeniń, ǵımarattyń sánin keltirip turady.
Kondıtsıoner baǵasyna keler bolsaq, eń arzany Taldyqorǵan, Shymkent, Kókshetaý, Túrkistan men Almaty qalalarynda satylady. Baǵasy 80 000 teńgeden bastalady. Qyzylorda qalasynda aýa baptaǵyshtyń baǵasy 85 000 teńge jáne odan joǵary. Al Atyraý, Astana, Pavlodar, Qostanaı, Oral, Petropavl, Taraz, Qaraǵandy men Aqtóbede baǵa ortasha. Munda eń arzanyn 89 000 – 90 000 teńgege satyp alýǵa bolady. Óskemen, Aqtaý, Jezqaǵan men Semeıde eń arzany – 100 000 – 120 000 teńge.
Kondıtsıoner qondyrý baǵasy Taraz (13 000 teńgeden bastalady), Taldyqorǵan, Almaty men Aqtaýda (15 000 teńgeden bastalady) arzan. Al Túrkistan, Oral, Shymkent, Atyraýda baǵa 20 000 teńge bolsa, Semeı, Pavlodar, Qyzylorda, Petropavl men Astanada 24 000 – 25 000 teńge. Kókshetaý, Jezqazǵan men Qostanaı qalalarynda kem degende 35 000 teńge tóleıdi. Al eń qymbat qyzmet túri Qaraǵandy, Óskemen (40 000 teńgeden bastalady) men Aqtóbede (45 000 teńgeden bastalady) tirkeldi.
Buǵan deıin Qazaqstanda saıabaqtaǵy attraktsıonda kóńil kóterý baǵasy týraly jazyldy.
