Qazaqstanda kondıterlik ónimderdi tańbalaý bastaldy: shokolad pen táttilerge QR-kod engiziledi
ASTANA. KAZINFORM - 2026 jylǵy 1 maýsymnan bastap Qazaqstanda kondıterlik ónimderdi tańbalaý boıynsha pılottyq joba bastaldy. Joba 2027 jylǵy 1 maýsymǵa deıin jalǵasady. Bul elde iske asyrylyp jatqan taýarlardyń tsıfrlyq qadaǵalanýyn qamtamasyz etý saıasaty aıasyndaǵy kezekti qadam, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Baspasóz qyzmetiniń habarlaýynsha, jobany maqsaty naryqty kontrafaktilik ónimderden qorǵaý jáne jetkizý tizbekteriniń ashyqtyǵyn arttyrý.
Jobaǵa saladaǵy jetekshi kompanııalar qosylyp úlgerdi. Otandyq óndirýshiler qatarynda «Baıan Sulý» JShS jáne «Lotte Rahat» JShS bar. Importtaýshylar qatarynda «Mars Kazahstan» JShS, «Ferrero Kazahstan» JShS, «Mon’delıs Kazahstan» JShS jáne «Nestle Fýd Kazahstan» JShS qatysyp jatyr. «Atameken» ulttyq kásipkerler palatasynyń derekterine sáıkes, «Baıan Sulý» men «Rahat» otandyq kondıterlik ónim óndirisiniń shamamen 50%-yn, al ımportty qosa eseptegende jalpy naryqtyń shamamen 30%-yn qamtıdy. Bul pılottyq jobanyń barynsha reprezentatıvti bolýyna jáne saladaǵy negizgi oıynshylardyń qatysýyna múmkindik beredi.
EAEO kelisimine sáıkes, tańbalaýǵa kondıterlik ónimderdiń negizgi sanattary jatady. Olardyń qatarynda qantty kondıterlik ónimder, shokolad jáne shokolad ónimderi, pechene, vaflı, unnan jasalǵan kondıterlik ónimder, marmelad, djemder, jemis jáne jańǵaq pastalary, sondaı-aq ónimniń basqa da túrleri bar.
Pılottyq kezeń tehnıkalyq jáne uıymdastyrýshylyq táýekelderdi anyqtaýǵa, bıznes-protsesterdi jetildirý qajettiligin baǵalaýǵa jáne normatıvtik bazany odan ári jaqsartý boıynsha usynystar qalyptastyrýǵa baǵyttalǵan. Qatysýshylar tańbalaý jáne qadaǵalaý aqparattyq júıesiniń fýnktsıonalyn tegin synaqtan ótkizýge, tańbalaý quralyn óndiristik jáne logıstıkalyq protsestermen ıntegratsııalaýdy pysyqtaýǵa, sondaı-aq ónimge kodtardy túsirýdiń túrli tásilderin synap kórýge múmkindik alady.
Tsıfrlyq tańbalaý tutynýshylardy kontrafaktilik jáne zańsyz ónimderden qorǵaýǵa, jetkizilimderdiń ashyqtyǵyn arttyrýǵa, adal básekelestikti qamtamasyz etýge jáne salanyń damýyna jaǵdaı jasaýǵa baǵyttalǵan. Mindetti tańbalaýdy engizý týraly sheshim pılottyq jobanyń qorytyndysy boıynsha, onyń nátıjeleri men naryq qatysýshylarynyń usynystary eskerile otyryp qabyldanady.
Búgingi tańda Qazaqstanda mindetti tańbalaý aıaq kıimge, temeki ónimderine, dárilik zattarǵa, syraǵa, motor maıyna jáne kıik múıizderine qatysty qoldanylyp keledi. Bıylǵy qyrkúıekte bıologııalyq belsendi qospalardy, al jeltoqsanda jeńil ónerkásip taýarlary men zergerlik buıymdardy tańbalaýdy engizý josparlanyp otyr. Turmystyq ballondardaǵy suıytylǵan gazdy jáne aǵash materıaldaryn tańbalaý boıynsha pılottyq jobalar aıaqtaldy. Sonymen qatar ósimdik maıyn, turmystyq hımııa taýarlary men kosmetıkany tańbalaý synaqtan ótýde.
Pılottyq jobaǵa qosylý úshin óndirýshiler, ımporttaýshylar jáne taýar aınalymynyń basqa da qatysýshylary Biryńǵaı taýarlardy tańbalaý men qadaǵalaý operatoryna info@digitaleconomy.kzelektrondyq mekenjaıy arqyly ótinim joldaýy qajet.
Osyǵan ddeıin Qazaqstanda jaǵarmaıdy molekýlalyq tańbalaý pılottyq jobasy iske qosylýy múmkin ekeni týraly jazdyq.
