Qazaqstanda qonaq úılerdiń reıtıngisin anyqtaıtyn aýdıtorlar ınstıtýty engiziledi
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine týrıstik salany qoldaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasyna Parlament Májilisiniń depýtattary bastamashy boldy jáne ol otandyq týrızmdi qoldaýdyń zańnamalyq bazasyn nyǵaıtýǵa baǵyttalǵan.
Májilistiń Ekonomıkalyq reforma jáne óńirlik damý komıteniniń málimetinshe, qujatta «Qazaqstan Respýblıkasyndaǵy týrıstik qyzmet týraly» Zańǵa ýákiletti organnyń qoıylatyn talaptardy aıqyndaý jónindegi quzyretterin naqtylaý bóliginde ózgerister engizý eskerilgen.
Sondaı-aq, zań jobasymen jergilikti atqarýshy organdardyń kásipkerlik sýbektileriniń týrısterdi ornalastyrý oryndaryn, sanatorıı-kýrorttyq uıymdardy, vızıt-ortalyqtardy, taý shańǵysy kýrorttaryna, jol boıyndaǵy servıs obektilerine arnalǵan jabdyqtar men tehnıkany ıelikten shyǵarmaý jáne nysanaly paıdalaný monıtorıngin júzege asyrý jónindegi jańa quzyreti engiziledi.
- Jergilikti atqarý organdaryna týrıstik basym aımaqtardyń shekarasyn derbes anyqtaý múmkindigi beriledi. Bul shara ınvestorlar úshin kúshti yntalandyrý bolmaq, óıtkeni ol bıýrokratııalyq kedergilersiz jergilikti deńgeıde sheshimder qabyldaýdyń ashyqtyǵy men tıimdiligin qamtamasyz etedi, - dedi Májilis depýtaty Pavel Kazantsev.
Sonymen qatar ol qyzmet kórsetý sapasyna qatysty ózgerister engiziletinin aıtty. Búginde gıdter men ekskýrsııa jetekshileri kásipkerlik sýbektileri retinde jumys isteıdi. Alaıda olardyń jumys sapasy men qaýipsizdikke qatysty talaptar belgilenbegen. Mundaı qyzmetterdi kórsetetin adamdarǵa qatysty esep joq. Shyn máninde, bul qyzmet týrıstik qaýipsizdikke de qatysty.
- Gıdter men ekskýrsııa jetekshileriniń biryńǵaı tizilimin qurý olardyń jumysyn retke keltiredi. Bul shara shekteýge emes, naryqtyń sapasy men ashyqtyǵyn arttyrýǵa baǵyttalǵan, - dedi depýtat.
Sonymen qatar, zań jobasynda qonaq úılerdi baǵalaý jáne olarǵa «juldyz» boıynsha reıtıngter berý úshin sarapshy-aýdıtorlar ınstıtýty engiziledi.
- Bul tásil qonaq úı qyzmetterin sertıfıkattaýdyń halyqaralyq standarttaryna sáıkes keledi. Osylaısha, zań jobasy týrıstik salany memlekettik qoldaýdyń ashyqtyǵyn kúsheıtedi, týrıstik qyzmet kórsetý sapasyna qosymsha talaptar engizedi, sondaı-aq azamattardy qorǵaıdy, - dedi P. Kazantsev.
Aıta keteıik, elde halyqaralyq deńgeıdegi 24 qonaqúı salynady.