Qazaqstanda kómirtekti eginshilik damıdy: Germanııanyń tájirıbesi qarastyryldy
ASTANA. KAZINFORM — Qazaqstan men Germanııa kómirtekti eginshilikti damytý, topyraq qunarlylyǵyn saqtaý jáne tozǵan jerlerdi qalpyna keltirý baǵytynda yntymaqtastyqty talqylady. Taraptar halyqaralyq tájirıbeni Qazaqstannyń agrarlyq salasyna engizý múmkindikterin qarastyrdy. Bul týraly AShM málim etti.
Germanııa delegatsııasynyń quramynda ınstıtýttyń Regeneratıvti jer paıdalaný jáne klımattyq turaqtylyq departamenti basshysynyń orynbasary Samı Cheltıkoglý jáne Ortalyq Azııadaǵy ókildiginiń basshysy Alııa Mýsına boldy.
Kezdesýde agrarlyq sektordy ornyqty damytýdyń negizgi baǵyttarynyń biri retinde Qazaqstanda kómirtekti eginshilikti damytý múmkindikterine basa nazar aýdaryldy.
Atap aıtqanda, topyraq qunarlylyǵyn saqtaý, aýyl sharýashylyǵy maqsatyndaǵy jerlerdi utymdy paıdalaný jáne tozǵan jer alqaptaryn qalpyna keltirý máseleleri qarastyryldy.
Sonymen qatar kómirtekti jobalardy iske asyrýdyń quqyqtyq negizderi, parnıktik gazdar shyǵaryndylaryn azaıtý, topyraqtaǵy organıkalyq kómirtek qoryn arttyrý, sondaı-aq jer resýrstaryn ornyqty basqarýdyń zamanaýı tásilderin engizý máseleleri talqylandy.
— Qazaqstannyń tabıǵı-klımattyq jáne agrarlyq erekshelikterin eskere otyryp, halyqaralyq tájirıbeni qoldaný, ǵylymı-praktıkalyq yntymaqtastyqty damytý jáne kómirtekti eginshilik salasyndaǵy bastamalardy iske asyrýdyń naqty tetikterin ázirleýge erekshe kóńil bólindi, — delingen habarlamada.
Tıisti sheshimderdi tájirıbege engizýdiń negizgi alańdarynyń biri retinde «JZQJJMI» mekemesiniń ǵylymı áleýetin paıdalaný múmkindigi qarastyryldy.
Kásiporynnyń ǵylymı-zertteý múmkindikteri men jer resýrstaryn zertteý baǵytynda jınaqtaǵan tájirıbesi birlesken bastamalardy júzege asyrýda mańyzdy ról atqaratyny aıtyldy.
Kómirtekti eginshilikti damytý aýyl sharýashylyǵy óndirisiniń ornyqtylyǵyn arttyrýǵa, topyraq sapasyn saqtaýǵa jáne eldiń jer resýrstary áleýetin tıimdi paıdalanýǵa qosymsha múmkindikter ashady.
Kezdesý sońynda taraptar kómirtekti eginshilikti damytý, jer resýrstaryn ornyqty basqarý jáne topyraqtyń sapalyq jaı-kúıin jaqsartý baǵyttaryndaǵy yntymaqtastyqty odan ári nyǵaıtýǵa múddelilik bildirdi.
Keıingi jyldary aýadaǵy zııandy gazdardy azaıtý úshin karbon eginshiligi qoldanylyp júr. Qazaqstan osy baǵytqa bet bursa, saladan jylyna $35 mlrd tabys tabýy múmkin. Ekonomıkalyq paıda men ekologııalyq tıimdilikti toǵystyrǵan karbon eginshiligi degenimiz ne, Úkimet qandaı jobalardy qolǵa alady? Kazinform-nyń analıtıkalyq sholýynan oqyńyz.
