Qazaqstanda kómirtek baǵasy men dekarbonızatsııa máselesi kóterildi
ASTANA. KAZINFORM — Qazaqstan men EYDU klımattyq saıasat, dekarbonızatsııa, kómirtekke baǵa belgileý jáne ornyqty ınfraqurylym baǵyttaryndaǵy yntymaqtastyqty talqylady. Taraptar jasyl ekonomıka men ekologııalyq retteýdi damytý jónindegi birlesken jumystyń perspektıvalaryn qarastyrdy. Bul týraly Ekologııa mınıstrligi málim etti.
Qazaqstan Respýblıkasynyń Ekologııa jáne tabıǵı resýrstar mınıstri Álibek Qýantyrov pen Ekonomıkalyq yntymaqtastyq jáne damý uıymynyń (EYDU) Jahandyq qatynastar jáne yntymaqtastyq jónindegi dırektoraty Eýrazııa bóliminiń basshysy Ýılıam Tompson Azııadaǵy ornyqty ınfraqurylym baǵdarlamasy (SIPA) aıasyndaǵy yntymaqtastyqtyń qazirgi jaı-kúıi men perspektıvalaryn talqylady.
Kezdesý barysynda taraptar klımattyq saıasat, dekarbonızatsııa, shyǵaryndylar saýdasy júıesin damytý, kómirtekke baǵa belgileý, sondaı-aq transshekaralyq kómirtekti retteý tetigi máselelerin qarastyrdy.
— Biz EYDU-men yntymaqtastyqty klımat, qorshaǵan ortany qorǵaý, ornyqty damý jáne jasyl ekonomıka salalarynda memlekettik saıasattyń zamanaýı standarttaryn engizýge arnalǵan mańyzdy alań retinde joǵary baǵalaımyz. Biz úshin Uıymnyń klımattyń ózgerýine beıimdelý, ornyqty ınfraqurylymdy damytý jáne ekologııalyq retteýdi jetildirý máseleleri boıynsha saraptamalyq qoldaýy erekshe mańyzdy, — dep atap ótti Á. Qýantyrov.
Mınıstr sondaı-aq Qazaqstan men EYDU arasyndaǵy 2027–2030 jyldarǵa arnalǵan Іs-qımyl josparynyń jobasy sheńberinde tsırkýlıarlyq ekonomıka salasyndaǵy yntymaqtastyqty damytýdy, atap aıtqanda, QTQ-ny qaıta óńdeý jobalaryn iske asyrý, ekologııalyq týrızmdi damytý, qoǵamdyq tyńdaýlar ótkizý jáne Kaspıı teńiziniń taıazdanýy máseleleri boıynsha ózara is-qımyldy kúsheıtýdi usyndy.
«Sý, energetıka jáne jer resýrstarynyń ózara baılanysy» (Nexus) jobasyna erekshe nazar aýdaryldy. Ony iske asyrý Qazaqstan Respýblıkasynyń 2024–2030 jyldarǵa arnalǵan «jasyl ekonomıkaǵa» kóshý tujyrymdamasynyń maqsattaryna qol jetkizýde mańyzdy ról atqarady.
Taraptar sondaı-aq Transkaspıı halyqaralyq kólik baǵytyn (Orta dálizdi) damytý aıasynda ınfraqurylymnyń klımattyq jáne ekologııalyq ornyqtylyǵy máselelerin talqylady.
Dálizdiń ekologııalyq jáne klımattyq ornyqtylyǵyn qamtamasyz etý maqsatynda Qazaqstan jaǵalaýdaǵy 50 núktede teńiz sýynyń sapasy men gıdrohımııalyq kórsetkishterge turaqty monıtorıng júrgizedi.
Kezdesý qorytyndysy boıynsha taraptar EYDU-men syndarly ári nátıjeli yntymaqtastyqty odan ári nyǵaıtýǵa úmit bildirdi.
Aıta keteıik, buǵan deıin Qazaqstan 2060 jylǵa deıin kómirtegi beıtaraptyǵyn kózdeıtinin jazdyq.
