Qazaqstanda kómirden gaz, dızel otyny jáne koks óndiretin jańa jobalar júzege asyp jatyr
ASTANA. KAZINFORM – Qazaqstanda kómirdi tereń óńdeý arqyly joǵary qosylǵan quny bar ónimder óndirýge baǵyttalǵan birqatar iri jobalar iske asyrylyp jatyr.
Energetıka mınıstrliginiń málimetinshe, kómir hımııasyn damytý kómir ónerkásibin jańǵyrtýdyń jáne jańa óndirister qalyptastyrýdyń negizgi baǵyttarynyń biri retinde qarastyrylyp otyr.
Qazirgi ýaqytta salada úsh iri joba júzege asýda.
– Qaraǵandy oblysynda jylyna 1 mıllıon tonna metallýrgııalyq koks óndiretin zaýyttyń qurylysy júrgizilýde. Joba aıasynda 500-ge deıin jańa jumys orny ashylady, – delingen habarlamada.
Sonymen qatar Pavlodar jáne Qaraǵandy oblystarynda kómirden dızel otynyn óndiretin eki kásiporyn salynýda.
Ár jobanyń óndiristik qýaty jylyna 100 myń tonnany quraıdy.
Budan bólek, kómir hımııasy salasynda taǵy úsh perspektıvaly joba pysyqtalyp jatyr.
Atap aıtqanda, Qaraǵandy oblysynda taskómir shaıyryn qaıta óńdeý, benzol óndirý jáne koks gazyn tazartý baǵytyndaǵy koks-hımııa óndirisin qurý máselesi qarastyrylýda.
Al Abaı oblysynda ammıak pen karbamıd óndirý jobasy ázirlenip jatyr.
– Taǵy bir perspektıvaly joba kómirden gaz óndirýdi kózdeıdi. Qazirgi ýaqytta ony iske asyrý alańy anyqtalýda, – dep habarlady Energetıka mınıstrligi.
Vedomstvonyń málimetinshe, Qazaqstannyń mol kómir qory kómirdi tereń óńdeý múmkindikterin keńeıtip, jańa joǵary tehnologııalyq óndirister qurýǵa múmkindik beredi.
Aıta keteıik, Qazaqstan EAEO-nyń ortaq energetıkalyq naryǵyna qatysty ustanymyn jarııalady.
