Qazaqstanda kómirden dızel otyny men tyńaıtqysh óndiretin jobalar iske asady
ASTANA. KAZINFORM – Qazaqstanda kómirdi tereń óńdeýge jáne qosylǵan quny joǵary ónim óndirýge baǵyttalǵan jańa perspektıvaly ónerkásip baǵyty – kómir hımııasy qalyptasyp keledi, dep jazdy Energetıka mınıstrligi.
Qazirgi ýaqytta salada úsh iri ınvestıtsııalyq jobany iske asyrý bastaldy.
Qaraǵandy oblysynda jylyna 1 mln tonna metallýrgııalyq koks óndiretin zaýyt salý jobasy iske asyrylýda. Qytaılyq ınvestormen ınvestıtsııalar týraly kelisimge qol qoıyldy.
Pavlodar oblysynda «Naz Dan Group» JShS kómirden dızel otynyn óndirý jobasyn iske asyrýda. Kásiporynnyń qýaty jylyna 100 myń tonnany quraıdy. Kompanııaǵa jer qoınaýyn paıdalaný lıtsenzııasy berildi.
Qaraǵandy oblysynda «Alfa Plast» JShS jylyna 100 myń tonna dızel otynyn óndirý qýattylyǵyna ıe uqsas jobany iske asyrýda. Jer qoınaýyn paıdalaný lıtsenzııasy berildi.
– Kómir hımııasy salasyn júıeli damytý maqsatynda Energetıka mınıstrligi kómir hımııasy jáne kómir óndirýshi kompanııalarmen, sondaı-aq basqa da múddeli uıymdarmen birlesip, 2026–2031 jyldarǵa arnalǵan Qazaqstannyń kómir hımııasy ónerkásibin damytý jónindegi jol kartasynyń jobasyn ázirledi. Jol kartasynyń jobasyna kómirdi tereń óńdeýge baǵyttalǵan birqatar perspektıvaly jobalar engizildi, – delingen habarlamada.
Atap aıtqanda, Qaraǵandy oblysynda «Qarmet» AQ bazasynda jylyna 200 myń tonnaǵa deıin shaıyrdy óńdeýdi, 35 myń tonnaǵa deıin benzol óndirýdi jáne koks gazyn tazartýdy kózdeıtin koksohımııa klasterin damytý josparlanýda.
Abaı oblysynda «Samal Commodities» JShS 300 myń tonna ammıak jáne 520 myń tonna karbamıd óndirýdi josparlap otyr.
Pavlodar oblysynda «Qaz Nedro Resýrs» JShS Sarykól ken orny bazasynda jylyna 100 myń tonna dızel otynyn óndirý jobasyn qarastyrýda.
Kómir hımııasyn damytý kómirdi paıdalanýdyń negizinen shıkizattyq modelinen joǵary qosylǵan quny bar ónim óndirýge kóshýge múmkindik beredi.
Aıta keteıik, buǵan deıin Qazaqstanda kómirdi tereń óńdeý arqyly sıntetıkalyq otyn men hımııalyq ónimder shyǵarý baǵytyn damytý josparlanyp otyrǵany habarlanǵan. Eldegi kómir qory shamamen 34 mlrd tonnany quraıdy.
