Qazaqstanda kómir ónerkásibin damytý jospary ázirlenedi
ASTANA. KAZINFORM — Úkimet kómir generatsııasyn damytý jónindegi ulttyq joba bekitilgennen keıin kómir ónerkásibin damytý josparyn ázirleýdi tapsyrdy. Bul týraly Energetıka mınıstri Erlan Aqkenjenov Qazaqstan kómir ónerkásibiniń VII forýmynda málim etti.
Mınıstrdiń aıtýynsha, jańa elektr stantsııalaryn salý ǵana jetkiliksiz. Generatsııany damytý kómir óndirýshi kásiporyndardyń óndiristik áleýetimen, kólik ınfraqurylymy men logıstıka múmkindikterimen qatar órbýge tıis.
Osyǵan baılanysty ázirlenetin qujat kómir salasynyń energetıka, ónerkásip jáne kommýnaldyq-turmystyq sektor tarapynan artyp kele jatqan suranysty qalaı qamtamasyz etetinin aıqyndaıdy.
— Ulttyq joba bekitilgennen keıin Úkimet kómir ónerkásibin damytý josparyn ázirleýdi tapsyrdy. Bul qujat ulttyq jobanyń jalǵasy bolyp, kómir salasynyń energetıka, ónerkásip jáne kommýnaldyq-turmystyq sektordyń ósip kele jatqan qajettiligin qalaı qamtamasyz etetinine jaýap berýi kerek, — dedi Erlan Aqkenjenov.
Onyń sózinshe, jospar formaldy qujat emes, salany damytýǵa baǵyttalǵan naqty jumys quraly bolýy qajet. Osy baǵytta Energetıka mınıstrligi kómir óndirýshi kásiporyndarmen, salalyq qaýymdastyqtarmen jáne múddeli memlekettik organdarmen birlesip jumys isteýge daıyn.
Eske salaıyq, buǵan deıin alty qalada jańa kómir generatsııa nysandary salynatyny týraly habarlaǵan edi.
