Qazaqstanda kómir óndirý kólemi artýda
ASTANA. KAZINFORM — Qazaqstan Respýblıkasynyń otyn-energetıkalyq keshenin damytýdyń 2023-2029 jyldarǵa arnalǵan tujyrymdamasynda kómir óndirýdi jyl saıyn ulǵaıtý kózdelgen.
Energııa óndirýshi jáne ónerkásip kásiporyndarynyń, bıýdjettik uıymdar men halyqtyń kómir ónimine qajettiligin qamtamasyz etý maqsatynda kómir hımııasyna kezeń-kezeńimen kóshe otyryp, kómir óndirýdi ulǵaıtý, sondaı-aq eldiń eksporttyq áleýetin arttyr baǵytynda jumys jalǵasyp jatyr.
QR Ónerkásip jáne qurylys mınıstrliginiń málimetinshe, jaqyn ýaqytta Bogatyr kómir kenishinde tsıkldik-aǵyndyq tehnologııa iske qosý kútilýde.
«Bul 42 mln tonnadan 50 mln tonnaǵa deıin kómir óndirýge múmkindik beredi. Óndirilgen kómirdiń jalpy kólemindegi kómir eksportynyń úlesi 26-28% quraıdy. Sońǵy bes jyldaǵy kómir eksportyn taldaý eksporttyq áleýettiń progressıvti sıpatqa ıe ekendigin kórsetedi», — dep jazdy vedomstvodan.
QR Ulttyq statıstıka bıýrosynyń derekteri boıynsha alys shet elderge tas kómir men lıgnıt eksporty 6,5 esege (1,3 mln.tonnadan 8,5 mln. tonnaǵa deıin) ulǵaıdy.
Bul, eń aldymen, Eýropalyq odaqtyń qazaqstandyq kómirge degen suranysynyń artýyna baılanysty. Osylaısha, otandyq jer qoınaýyn paıdalanýshylardyń eksporttyq áleýeti suranysqa saı arta túsetin bolady.
