Qazaqstanda komplaens-qyzmeti ne úshin qajet – maman jaýaby

NUR-SULTAN. QazAqparat – Elimizde kvazımemlekettik jáne jeke sektorlarda sybaılas jemqorlyqqa qarsy komplaens-qyzmetin engizý belsendi júrip jatyr. Osy oraıda atalǵan qyzmettiń maqsaty men onyń ne úshin qajet ekendigi týraly «Samuryq-Qazyna» ulttyq ál-aýqat qory AQ-nyń komplaens qyzmetiniń basshysy Dáýren Aqshalov aıtyp berdi, dep habarlaıdy QazAqparat tilshisi.

«Komplaens-qyzmeti uǵymy bizge shetelden kelgen. Ol sáıkestik degen maǵynany bildiredi. Atalǵan qyzmettiń maqsaty – halyqaralyq zańnamalardyń sáıkestigin tekserip, monıtorıng júrgizý. Sol sııaqty taldaý jasaý. Odan bólek, komplaens-qyzmeti ádep kodeksiniń buzylýy men sybaılas jemqorlyq áreketine jol bermeýmen kúresedi. Sonymen qatar bul qyzmet burynǵy KSRO elderi arasynda Qazaqstanda alǵash engizilip otyr», - dedi Dáýren Aqshalov QR Sybaılas jemqorlyqqa qarsy is-qımyl agenttiginde ótken AntikorLive jobasynyń efırinde.

Onyń aıtýynsha, búginde komplaens-qyzmeti elimizdiń kvazımemlekettik uıymdarynda engizilip jatyr.

«Osy qyzmettiń taǵy bir mańyzdylyǵy Qazaqstanǵa ınvestıtsııaǵa quıýǵa qyzyǵýshylyq tanytqan kez kelgen ınvestor, aldymen eki máseleni anyqtap alady. Birinshi, bıznesti damytýǵa qandaı jaǵdaı jasalǵan, ekinshi sybaılas jemqorlyq qaýpin joıý qalaı rettelgen. Mine osy tusta komplaens-qyzmetiniń róli erekshe. Soǵan qosa bıyl Májiliste elimizdegi komplaens-qyzmetin táýelsiz etý máselesin kóterdim. ıAǵnı komplaens-qyzmetkeri ashyq ári erkin jumys isteýi qajet», - deıdi ol.

Aıta ketsek, kvazımemlekettik kompanııalarda sybaılas jemqorlyqqa qarsy komplaensti engizý ótken jyldyń sońynda zańnamalyq turǵyda mindetteldi.