Qazaqstanda kompıýterlik baǵdarlamalaý bastaýysh synyptan oqytyla bastaıdy

ALMATY. QazAqparat - Búgin Almatyda ótip jatqan «Jahandaný dáýrindegi tsıfrlyq kúntizbe» forýmynda QR Premer-Mınıstriniń orynbasary Asqar Jumaǵalıev tsıfrlyq jobalardy júzege asyrý baǵytynda atqarylyp jatqan jumystar jaıynda baıandady, dep habarlaıdy QazAqparat tilshisi.

Vıtse-premerdiń aıtýynsha, memleket tsıfrlyq tehnologııalardy damytýǵa barynsha kúsh salyp otyr.

«Balalardy bastaýysh synyptan baǵdarlamalaýǵa úıretetin bolamyz. Joǵarǵy synyp oqýshylaryna kásipkerlik boıynsha tálim alý mańyzdy. Olar startapty, óndiristi qalaı bastaý kerektigin bilýi tıis. JOO-larda barlyq mamandyqtar boıynsha ІT-tehnologııalardyń oqytylýyn qadaǵalaımyz. Mamandardyń ІT salasynda alǵan bilimin jetildirýge kúsh salamyz», - dedi Asqar Jumaǵalıev.

Búginde Qazaqstan elektrondy úkimetti damytý boıynsha reıtıngte 33-orynda tur.

Aıta keteıik, forým barysynda QR Premer-Mınıstri Baqytjan Saǵyntaev elimizde memlekettik qyzmetti avtomattandyrýdy 80%-ǵa jetkizý kózdelip otyrǵanyn aıtqan bolatyn.

«Bizge arnaıy telekommýnıkatsııalyq ınfraqurylym kerek. Eldi mekenderdiń barlyǵynda keń jolaqty ınternet bolýy tıis. Optıkalyq talshyqtar kirmeıtin jerlerge 2020 jylǵa deıin spýtnıktik baılanysty paıdalanatyn bolamyz. Tsıfrlandyrý tehnologııasyn engizý óndiristi birneshe ese arttyrýǵa septigin tıgizbek. Sondyqtan, úkimet ınnovatsııalyq ekojúıe quryp otyr. Osy maqsatta eldegi jas bilikti mamandardy yntalandyrý qolǵa alynǵan», - dedi A.Jumaǵalıev.