Qazaqstanda kompıýterlik baǵdarlamalardyń 70 paıyzy lıtsenzııasyz qoldanylady

NUR-SULTAN. QazAqparat – Qazaqstanda paıdalanylatyn baǵdarlamalyq qamtylymnyń 70 paıyzdan astamy «lıtsenzııasyz» qoldanylady. Mundaı ózgeris Tsıfrlyq ekojúıeniń damytýdyń 2022-2027 jyldarǵa arnalǵan («Kıberqalqan-2») tujyrymdamasynda kózdelgen, dep habarlaıdy QazAqparat tilshisi.

«Qazirgi ýaqytta otandyq aqparattyq keńistik sheteldik apparattyq jáne baǵdarlamalyq sheshimderge táýeldi bolyp qala beredi. Bilikti kadrlar bolmaǵan jaǵdaıda IT jobalardy kommertsııalandyrýdyń tıimsiz júıesi salanyń damýyn qıyndatady. Máselen, búgingi tańda Qazaqstanda paıdalanylatyn baǵdarlamalyq qamtylymnyń 70 paıyzdan astamy lıtsenzııasyz bolyp sanalady», - delingen tujyrymdamada.

Qujatta azamattardyń ártúrli Internet-resýrstarǵa jeke derekterdi zańsyz jarııalaý týraly shaǵymdarmen júginý faktileri jıilep ketken. Tekserý barysynda derbes derekterdi alý kózderi «Aqparatqa qol jetkizý týraly» Qazaqstan Respýblıkasynyń Zańyna sáıkes ashyq derekterdi jarııalaıtyn memlekettik organdardyń jalpyǵa qoljetimdi resýrstary bolyp otyrǵany anyqtalǵan.

2021 jyly 106 eldiń «Facebook» áleýmettik jelisiniń 533 mln paıdalanýshysynyń jeke derekterine erkin qol jetkizilgen. «Memlekettik tehnıkalyq qyzmet» aktsıonerlik qoǵamynyń derekterine sáıkes, osy jaıt aıasynda Qazaqstannyń paıdalanýshylaryna tıesili derekterdiń 3,2 mln joly (T.A.Á., telefon nómirleri, turatyn jeri, jumys jáne oqý orny) jarııa bolǵan.