Qazaqstanda kommýnaldyq tarıf ósedi
Búgin Senattyń jalpy otyrysynan keıin tilshiler mınıstrlen elimizde jelilerdiń tozýy kórsetkishine qaraı tarıfter qalaı ózgeretinin surady.
«Kelesi jylda, ıaǵnı ekinshi jartyjyldyqtan bastap tıisti ózgerister bolady. Sebebi sýbektilerge, sodan keıin memlekettik menshikte bolatyn sýbektilerge óz jumysyn jańǵyrtyp, jelilerdi jańartý kerek. Prezıdent saılaýaldy baǵdarlamasynda tıisti kórsetkishterdi belgiledi. Osy oraıda júrgizilgen esepteýlar aıasynda jelilerdiń tozý kórsetkishin 15-20 paıyzǵa tómendetemiz. Tarıf kóteriledi, basqa jol joq. Eń kúrdeli nysandardy qaraımyz. Olar jan-jaqty zertteledi. Oǵan baılanysty tıisti tarıfti kóterý máselesi qaralady», - dedi Á. Qýantyrov.
Onyń sózine qaraǵanda, atalǵan zertteýler aıasynda tarıfterdiń kólemi naqtylanady.
«Mysaly, Ekibastuzda sýbekti tarıfti 2,5 ese kóterýge usynys berdi. Árıne, osyndaı deńgeıde kóterý múmkin emes. Sondyqtan ony áli de talqylaımyz», - dedi vedomstvo basshysy.
Bul turǵyda mınıstr tarıf kóterý aıasynda turǵyndardyń jaǵdaıy nazarǵa alynatynyn, halyqqa eleýli aýyrtpalyq túsirmeý máselesi egjeı-tegjeıli qaralatynyn aıtty.
Aıta keteıik, búgin Senatta qaralǵan «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy qaraldy.
Qujatta ınvestıtsııalardy ulǵaıtý jáne kommýnaldyq jelilerdiń tozýyn azaıtý úshin qajetti jumystardy júrgizý maqsatynda zańda bekitilgen tarıfti onyń qoldanylý merzimi aıaqtalǵanǵa deıin ózgertý turǵysynda qosymsha negizdi kózdeıtin túzetýler usynyldy.
Álibek Qýantyrov bul norma qabyldansa, kásiporyndar tarıfti óz erkine qaraı kótere almaıtynyn túsindirdi.
«Bul rette tıisti shekteýler bolady. Ár sýbekt pen óńir boıynsha tarıfterdi kóterý týraly usynystaryn egjeı-tegjeıli qaraımyz. Atap aıtqanda, bizdiń vedomstvoda, odan keıin qoǵam talqylaýynda bolady», - dedi mınıstr.
