Qazaqstanda kommýnaldyq qyzmetter bir jylda 4% qymbattaǵan

NUR-SULTAN. QazAqparat – 2021 jyldyń qańtarynda turǵyn úı qyzmetteri, sý, elektr energııasy, gaz jáne basqa da otyn túrleriniń tarıfteri byltyrǵy jylǵy qańtarmen salystyrǵanda 3,8%, al bir aı ishinde 0,6% qymbattady, dep habarlaıdy QazAqparat Finprom agenttigine silteme jasap.

Sondaı-aq bir jylda qoqys shyǵarý birden 19,1%, úıge qyzmet kórsetý jáne jóndeý qyzmetteri 6,3%, elektr energııasy 5,2% ósti. Sý tartý jáne ortalyqtan jylytý qyzmeti sáıkesinshe 1% jáne 2% arzandaǵan.

Elimizdiń qalalary boıynsha qoqys shyǵarýdyń ortasha tarıfi jan basyna 264 teńge boldy. Bir jyl buryn bul kórsetkish 173,3 teńge edi.

Ystyq sý tarıfi bir jylda 15,5% qymbattap, 1 tekshe metri úshin 267,6 teńgege jetti. Sýyq sý 3% ósip, 1 tekshe metri úshin 70,4 teńge boldy.

Taratý jelileri arqyly jiberiletin tabıǵı gaz baǵasy 33,5% ósip, tekshe metrine 25 teńgeni qurady. Suıyltylǵan gaz quny 5,3 artyp, kelisine 160,3 teńge boldy.

Qazir aýyz sý tarıfi qalaǵa qaraǵanda aýyldyq jerde qymbat. Oǵan sý júrgizý ınfraqurylymynyń qymbattyǵy, aýyldardyń alshaqtyǵy, turǵyndardyń az qonystanýy jáne basqa da faktorlar áser etedi. Óńirlerdegi sý baǵasyn tómendetý úshin shyǵyndardyń bir bóligin memleket óz moınyna alady.