Qazaqstanda kommýnaldyq jelilerdi jańǵyrtýǵa 6,8 trln teńge qajet

ASTANA. KAZINFORM – Kommýnaldyq ınfraqurylymdy jaqsartýǵa 6,8 trln teńge ınvestıtsııa tartylady. Bul týraly elordada «Energetıkalyq jáne kommýnaldyq sektorlardy jańǵyrtý» ulttyq jobasyn talqylaý kezinde QR Ulttyq ekonomıka vıtse-mınıstri Asan Darbaev málim etti.

Onyń aıtýynsha, salalar boıynsha qoldanystaǵy kommýnaldyq ınfraqurylymǵa taldaý jasaldy.

Oǵan sáıkes jelilerdiń qazirgi tozý deńgeıi:

- 17 jylýmen jabdyqtaý kásipornynda – 65%-dan 90%-ǵa deıin;

- 18 elektr energııasymen jabdyqtaý nysanynda – 70%-dan 97%-ǵa deıin;

- 23 sýmen jabdyqtaý kásipornynda – 70%-dan 100%-ǵa deıin;

- 24 aǵyndy sýlardy burý nysanynda – 70%-dan 100%-ǵa deıin.

- Osyǵan baılanysty bul saladaǵy ınfraqurylymnyń tozýyn toqtatý úshin 86 myń shaqyrym ınjenerlik jelini jóndeýge 6,8 trln teńge ınvestıtsııa tartý qajet. Bul rette, apatty qaýip edáýir azaıyp, ınjenerlik ınfraqurylymnyń jaǵdaıy «tehnologııalyq deńgeıge» deıin kóteriledi, - dedi Asan Darbaev.

Mınıstrlik aqparatyna qaraǵanda:

- jylýmen qamtamasyz etýge – shamamen 1,3 trln teńge, 1,6 myń km jelini jańǵyrtý;

- elektr energııasymen jabdyqtaý – 3,8 trln teńgeden astam, 77,6 myń km jelini jańǵyrtý;

- sýmen jabdyqtaý – shamamen 600 mlrd teńge, 4,7 myń km jelini jańǵyrtý;

- sý burý salasyna – 1,1 trln teńgeden astam, 2,6 myń km jelini jańǵyrtý qarastyrylǵan.

Budan buryn habarlaǵandaı, energetıkalyq sektorda jańǵyrtýdyń ulttyq jobasyn bes jáne odan da uzaq merzimde júzege asyrý úshin 13 trln teńge qajet.